Upernavik nersornaasigaavoq
Isumannaallisaaneq pillugu nersornaat akimasooq Kangerlussuarmi tunniunneqarpoq, tamaanilu ipput siulersuisut katersuunneranut atatillugu Mittarfeqarfinni mittarfiit pisortai tamarmik.
”Aatsaavissuaq isumannaallisaaneq – safety – pillugu nersornaammik tunniussaqarpugut. Isumannaallisaanermik suliarisarput suliffeqarfimmut tamarmut tunngavoq. Pineqartut tassaapput pinaveersaarutitut iliuuseqartarnerit, ukiormannalu Upernavimmi mittarfik nersornaaserneqarpoq. Mittarfimmi pisortamut Karl-Peter Hansenimut suleqataanullu,” oqarpoq pisortaaneq Henrik Estrup.
”Iliuuseqarluarsimaqaat assullu nersortariaqarput”.
Isumannaallisaanermut tunngasumik sianiginninneq pissutigalugu Upernaviup eqqaani Kangerlussuarmi qulimiguullit mittarfiata matunissaanik Mittarfeqarfiit aggustimi aalajangiuppaat. Nunaqarfimmi qulimiguullit mittarfiannut eqqaavissuaq qanittumi inissisimavoq, eqqakkallu qulimiguullit mittarfiannut teqqaasalersimapput.
Taamanikkut Jesper Lynge-Krog atuukkallartutut safety manageriuvoq, isumannaallisaanermullu nersornaat pillugu imatut oqaaseqarpoq:
”Nalaataqarneq pimmat Upernavimmi suleqatigut assut qanimut oqaloqatigisarpakka, sulilluarniutigalugulu iliuuserisaat assut tulluusimaarutigaara. Isumannaallisaaneq pillugu nersornaat pingaartuuvoq, tassaavorlu assut samminiagarput. Arlaannik naleqqutinngitsumik pisoqartutut isumaqaraangamik sulisorisagut siunissamut tunngatillugu qisuariallaqqissuupput. Qulimiguullillu mittarfiata qanitaani eqqakkanik teqqaasoqarnerani annertuumik isumannaallisaanikkut aarleqqutissaqarsorigamikku Karl-Peter Hansen sulisuilu qisuariapallallutillu iliuuseqarput. Puussiat plastikkit eqqakkallu allat qulimiguullip aquutaanit tunorlermit millugussaanissaannut aarleqquteqartoqarpoq.”
Avannaata Kommunia attavigineqarpoq, aatsaallu nalaataqarneq pitsaaliorneqarmat qulimiguullit mittarfia ammaqqinneqarsinnaalerpoq.
”Sulisugut eqqortuliorput, isumannaallisaanerlu isumaliutigaat. Suliaq pitsassuaq suliaraat, taamaattumillu ukiormanna isumannaallisaaneq pillugu nersornaatisinerat naleqqulluinnarpoq,” Jesper Lynge-Krog oqarpoq.
