Teknikkikkut unamminartut Maniitsumi timmisartuussinermut akornutaapput

Distance Measuring Equipment (DME) taaneqartartut timmisartortartumut mikkiartornermi timmisartup miffissamiit qanoq ungasitsigineranik nalunaartartut, Maniitsumi piffissami kingullermi ajoquteqarlutik atorsinnaasimanngillat. Unammilligassamut tamatumunnga aaqqiissutissarsisoqarmat, suliaq aallartinneqarpoq

Miffigineqarsinnaaneranut sunniuteqarpoq
Distance Measuring Equipment (DME) tassaapput radio atorlugu sumiissusersiornermut atortut immikkut ittut mittarfinnut ataasiakkaanut naapertuussakkat. Mittarfimmi atortorissaarutit tunngavigalugit timmisartup missinnaannginnera, taamaallaalli isikkivigitsillugu mittarfimmut minniartoqarsinnaanera, DME-it atorsinnaannginnerisa kinguneraat. Taamaalilluni DME-it amigaataanerat timmisartuussinermi isumannaallisaanermut sunniuteqarani taamaallaat mittarfiup miffigineqarsinnaaneranut sunniuteqarpoq.

Aaqqissutissaq aalajangerneqarpoq
Mittarfeqarfiit teleteknikkikkut immikkoortortaqarfiata piffissami kingullermi DME-it ajoqutaasa aaqqiissuteqarfiginiarnerat annertuumik ulapputigaa. DME-inik aaqqissorniarneq suliassaavoq annertooq. Atortussanik eqqortunik pisisarfimmi uninngasuutigineqartuaannanngitsunik pissarsiniarnissap saniatigut, atortorissaarut ikkussorneqassaaq, misilerarneqassaaq akuerineqassallunilu.

-Matumani pineqarput atortorissaarutit immikkorluinnaq ittut, pissarsiariniartarneri, ikkussuuttarneri atornissaalu pisariusut. Allatut oqaatigalugu paasilertoruminaatsuuvoq ullumikkulli aaqqiissuteqarnissaq qanillineruvoq, teknikkeqarnermut pisortaq Mike Sanimuinaq Kristiansen nassuiaavoq imalu nangilluni:

-Maniitsumi mittarfimmut pilertornerpaamik pitsaanerpaamillu, isumannaatsumik pisortallu piumasaqaataannut naapertuuttumik aaqqiissuteqarnissaq, sapinngisarput tamaat suliniutigaarput. Maannalu Maniitsumi timisartuussinerit siunissami qaninnerusumi pissusissamisuuleqqissinnaanissaat qilanaarisinnaanngorparput, teknikkeqarnermi pisortaq naggasiivoq.

Atortorissaarut martsimi misilerarneqassaaq
Mittarfeqarfiit atortorissaarutinik misileraallutillu akuersissuteqareerpat, atortorissaarutit atoqqilernissaannut timmisartoqarfimmi pisortat akuersissuteqaqqullugit qinnuigineqassapput. Pisortat marsip aallartisimalernerani atortorissaarutinik misileraasinnaanissaat naatsorsuutigineqarpoq. Atortorissaarutit akuerineqarpata tamatuma kingunitsianngua atorneqarsinnaalissapput.

PAASISSUTISSAT

DME-mik nutaamik inniminniissagaani ima pisoqassaaq:

• Atortorissaarutini piumasaqaataasut mittarfimmut atorneqarfissaannut tunngatillugu pisariaqartitat nassuiarneqassapput
• Atortorissaarutit pisortanit akuerisamit sanaartornissaannut inniminniisoqassaaq
• Atortorissaarutit naammassisat mittarfimmut nassiunneqassapput
• Mittarfiup nammineq misileraanerit annertuut ingerlatissavai
• Misilerarneqareerpata ikkussorneqariarlutik misileraqqinneqassapput
• Pisortat akuersissummik qinnuigineqassapput
• Pisortat namminneq misileraajartorlutik mittarfiliassapput
• Pisortat akuersereerpata aatsaat atortorissaarutit atorneqarsinnaanngussapput
• DME nutaaq mio. koruunit missaani akeqarpoq