Sisimiuni ajunaarnersuaqartuusaartitsilluni sungiusarneq
Ukiut sisamakkaarlugit mittarfinni kalerrisaarinermut pilersaarutit misilerarneqartarput ajunaarnersuaqartuusaartitsillunilu sungiusartoqartarluni. Apriilimi taamatut Sisimiuni sungiusartoqarpoq. Ajunaarnersuaqartuusaartitsilluni sungiusarneq ullaakkut kaffisoqartigiinnermi imaalitsiaannaq piareersarneqarneq ajorpoq ualikkullu sungiusarluni. Suliarujussuuvoq mittarfiit tungaannit aallartinneqartussaq, illoqarfimmili suleqatigisanik assigiinngitsunik akuutitsinermik ilaqakkajuttartoq.
”Illoqarfik tamapajaami akuliutsinneqartarpoq,” mittarfiup pisortaa Bo Olsen oqaluttuarpoq. Sisimiuni inuit 200-nik amerlanerusut akuliutsinneqarput kiisalu kommuni, politiit, Air Greenland, Blue Water allallu ajunaarnersuaqartillugu upalungaasimassutit misilerarpaat. Bo Olsenip nassuiaavoq, nammineq mittarfimmi pisortatut suliniuteqartuulluni, illoqarfimmut mittarfiup tungaanit piumasaqaataammat, illoqarfiup ukiut sisamakkaarlugit ajunaarnersuaqartuusaartitsilluni sungiusartitsinissaa. Ajunaarnersuaqartillugu ataatsimiisitaliami ilaasortatut Bo Olsen Politiit, Qatserisartut Peqqinnissaqarfiullu suleqatigiinnissaannut annertoorujussuarmik akisussaaffeqarpoq. Taamaasilluni ajunaarnersuaqartillugu ataatsimiisitaliaq aqqutigalugu sungiusarnerup pilersaarusiorneqarnera ataqatigiissarneqarneralu pisarpoq. Mittarfik imaluunniit politiit pisuusaartitassamut sungiusarnermi pisussamut siunnersuuteqartarput.
Iliuuseqarnermut aqutsisoq holdinillu aqutgsisoq naapiffimmi – talerpiatungaanit Peter Jakob Lennert, Karl Jørgen Lennert, holdinik aqutsisoq politineersoq, Poul Leander
Sisimiuni politiit sungiusarnissami pisuusaartitassamut siunnersuut apriilip naalernerani saqqumiuppaat. Pisuusaartitassaq taaguuteqarpoq ”Ajunaarneq piffinni marlunni ajoqusertoqarluni” siunertarlu tassaavoq pilersaarutit, ataqatigiissaarinerit qisuariarnissamullu piffissap misilerarnissaat. Pisuusaartitassaq imatut isikkoqarpoq:
Timmisartoq 37-inik issimasulik illoqarfik qulaallugu motorimi aappaa Sanaartornermut Ilinniarfiup KTI-ip illoqarfiup qeqqaniittumut katappaa. Timmisartoq mittarfimmut nakkarpoq tamatumalu kingunerisaanik inuit aqqaneq marluk annikitsumik ikilerneqarput, aqqaneq marluk annertuumik ikilerneqarput 13-illu toqullutik. Illoqarfimmi inuit 60-it illumit annaanniarlugit anninneqassapput, tamatumali aamma KTI-mut qimagutsitsinissamut pilersaarut atorneqassaaq kalerrisaarinermullu pilersaarut malinneqassalluni.
Nakorsat peqataasunik ajoquserujussuarsimasunik ajunaarnersuaqartuusaartitsilluni sungiusarnermi passussisut
Mittarfimmi sulisut annertuumik suliassamik kivitsisuupput iliuuseqarnermullu aqutsisut sungiusarnermi taama annertutigisumi iliuusissaat pingaarutilerujussuulluni. Bo Olsen allallu ajunaarnersuarmut ataatsimiisitaliami ilaasortaasut sungiusarnermi naliliisuupput suullu tamarmik pissusissamisut ingerlanissaat aamma Bop, sungiusaarnermik aallartitsisussap, nakkutigisussaavai. Kalerrisaarutit appippata, mittarfimmiit sukkasuumik qisuariartoqassaaq. Qatserisartut minutsip ataatsip ingerlanerani piariissapput, minutsit marluk qaangiunneranni qatserisartut ajutoorfiusumut apuussimassapput minutsillu tallimat qaangiutiinnartut ikuallanneq qaminneqariissaaq. Ajunaarnersuarmik kalerrisaarutip mittarfimmiittut qatserisartut politiillu illoqarfimmiittut aggeqqussavai sulisullu allat mittarfimmut suliartoqquneqassallutik. Sungiusarneq tamarmi
Pilersaarutit malillugit ingerlavoq Bollu mittarfiup iliuuseqarnera naammagisimaartorujussuuaa.
”Sulisutsinnut sungiusarneq iluatsittorujussuuvoq. Iliuuserisagut pissusissamisoorput. Upalungaarsimanermut pilersaarummi allassimasutu ingerlavoq, taamaattumik sungiusarneq una nuannaarutigisorujussuuara,” Bo Olsen nassuiaavoq.
