Qaarsuni sulisunut inissiat nutaat
Qaarsuni mittarfiup eqqaani illut nutaat tallimat sananeqarput. Inissiat tallimat taakkua tassaarsuaqarneranut isumannaagaapput aammalu annaassiniartoqartussanngornerani mittarfiup sulisoqarnissaata qulakkeernissaanut Namminersorlutik Oqartussaniit aningaasaliiffigineqarlutik.
”Inissiat sulisunut sumiiffinni aarlerinartorsiorfiusuni najugaqartunut neqeroorutigaagut. Sulisut nuukkusunnerlutik nammineerluinnarlutik aalajangissavaat. Uanga nammineerlunga mittarfimmut atasumi inissiami najugaqarpunga. Sulisut allat amerlanersai nunaqarfimmi najugaqarput, taamaattumi manna uumaariffiuallaanngilaq. Igalaakkut itsuaraangama taartuinnaasarpoq. Maannakkut sanilitaartussanngorpunga, tamannalu qilanaaraara,” oqarpoq Qaarsuni mittarfiup pisortaa James Nielsen.
Inissiat ukiortaami naammassissasut naatsorsuutigineqarsimavoq, kisianni piffissamut pilersaarut kinguaattuulaarsimavoq. Illut pingasut siulliit naammassereerput, kingulliillu marluk sapaatit akunneri marlussuit qaangiuppata naammassissasut naatsorsuutigineqarluni.
Salik Qaarsuni terminalimi sulisuuvoq, aammalu taanna aappanilu Kuuna illut nutaat ilaannut nuuttussani siullersaapput.
”Illut ilaanni najugaqarnissamut periarfissaqaleratta ingerlaannaq akuersivugut. Illu nutaajuvoq kusanartorsuullunilu, aammalu nammineq ineqalerluni nuannerpoq. Mittarfimmi siusinnerusukkut najugaqarfigisatsinni unnuisarfimmiilluni nuanneraluarpoq, kisianni mikineruvoq aammalu illutaani allanik unnuiartortoqartarluni, taamaattumik illutaarput nuannarisorujussuuarput. Unnuisarfik illulu nutaaq, tassaarsuaqarnerani mallit qarsutsisussat portussusissaasa qulaanni inissisimapput, tamatumalu toqqissisimalersippaatigut,” oqarpoq Salik.
