Nuup mittarfiani Café iluatsilluartumik ammaanersiortoq
Nuup mittarfiani Café Mocca septemberip 8-ni ammaanersiorneqarpoq. Soqutiginninneq imaannaasimanngilaq nutaarsillutik nerisassianut nioqqutaasunut friskinut kaffinullu assigiinngitsorpassuarnut toqqarneqarsinnaasunut.
Suliffiutillit aappariit Krissie Michael Winberg-ilu Nuup mittarfiani Café Moccamik ingerlatsisuupput. Cafép kioskitaani nioqqutissat assigiinngitsorpassuupput nerisassallu nillertut ullup ingerlanerani ilaneqaqattaartuartartussat assigiinngiiaartunik qinigassiisunik. Ullaakkut ullaakkorsiuteqartassaaq ullullu ingerlanerani soorlu sushit, salatit, bagelsit allarpassuillu pisiassaasassapput.
” Qinigassaqarpassuaqartassaaq nioqqutissaatigullu friskiusassapput akitigut sapinngisarput tamaat unammillernartuutitsiniarsarissaagut, Café Moccap ilisarnaatigissavaa akimikkut pitsaassutsimikkullu atoruminartunik nioqquteqarneq. Assersuutigalugu nutaaliamik ekspressomaskinataarsimavugut kaffinik assigiinngitsunik nioqquteqarumalluta saniatigut juiciliuummik peqarpugut nutaarluinnarmik juiceliorsinnaanngorluta,” Krissie Winberg oqarpoq, isertorsinnaanagulu qilanaarsimaqaluni ammaanissamik tungaanut oqaatigalugu.
”Isertussanngilara piffissap sivisuup ingerlanerani assut mittarfiup kioskia eqqarsaatitsinniitittarsimavarput, pilerigalugu pissanganartillugulu ingerlannissaa,periarfissaqarniariarlutalu iliuuseqarfigaarput” oqarpoq.
Taassuma saniatigut ukuninnga aappariit Krissie uinilu Michael Winberg Nuummi ingerlatsisuupput: Pizzahuset, Sushihuset, Esmaralda kiisalu Pascucci.
” Aatsaavissuaq misililerparput mittarfinni ingerlataqarluta. Pisiniartartuusussat qassiusarumaarnissaat nalulluinnarparput, atortorissaarutinik nutaarsuarnik pisiortorpugut unamminartikkatsigu pissanganaralugulu” Krissie oqaluttuarpoq. Massakkuugallartumut nioqqutissaatiminnut caféllu isikkuanut tunngatillugu nuannersuinnarnik oqaluttunik tusaasaqarpoq.
Cafép ammasarfissai timmisartut angallattut piffissaannut iluarsartuunneqartassapput, taamaalilluni Café Mocca ammasassaaq aallarfissat akunnermik sioqqullugit.
