Nuuk mittarfitsialattut toqqarneqarpoq
”Nuummiipput siulersuisut aalaakkaallutillu suliassanik samminnittut, sulisut pikkorissut, taakkulu mittarfiit allat ingerlatarinerisa qularnaarnissaannut ikiueqataanermut naleqqiullugu iliuuseqarnissaminnut piareersimapput”, oqarpoq Mittarfeqarfimmi pisortaaneq Henrik Estrup.
Nersornaat ”Ukioq manna mittarfitsialak” Kangerlussuarmi aaqqissuussinermi, Mittarfeqarfinni mittarfiit tamarmik mittarfiit pisortaasa ilaaffigisaanni tunniunneqarpoq.
Henrik Estrup: ”Suliffitsinni suleqatit pikkorissorpassuit sulisoraagut. Sulisut salliuniartartut, suliarisaminnik pimoorussisut, aammalu pitsaanerpaamik niuerfigisanik kiffartuussisartut. Ukiormanna Nuummi mittarfik immikkut maluginiarsimavarput. Nuummiipput siulersuisut aalaakkaasut suliassanillu samminnittut, suliffeqarfiup periusissiaanik tapersersuisut. Aamma sinerissami mittarfiit ingerlatarineri qularnaarniarlugit suleqatigisamik ikiornissaannut tunngatillugu iliuuseqartarnissaminnut piareersimasarsimapput.”
Ingerlatsinermut pisortap Niels Grosenip nersornaatip Nuup mittarfianut tunniunneqarnera aamma nuannaarutigaa.
”Nuummi mittarfiup iluarsaassineq annertunerusoq aqqusaarsimavaa, taamaattoqaraluartorlu siulersuisut sulisuusullu ilaasunut sapinngisamik annikinnerpaanik akornusersuuteqartillugu ingerlatsisinnaasimapput. Mittarfik ukiunik 40-nik pisoqaassuseqarpoq, atugassallu pissaaleqiffiugaluartut pitsaanerpaamik atugaqartitsinissaq sammisarineqarsinnaasimavoq.”
”Aammattaaq mittarfinnik nutaanik taakkuninnga suliaqarnermut atatillugu siulersuisut sulilluarniarlutillu naammassisassanik samminnittuusimapput. Assersuutigalugu ilisimasatik, kiisalu mittarfinnik ingerlatsinerup iluani misilittakkatik atugassiissutigisimavaat.”
Pitsaassutsimut nersornaat
Ukioq manna mittarfitsialammik nersornaatip saniatigut ’Ukioq mana pitsaassutsimut Nersornaat’ aamma tunniunneqarpoq, taannalu aamma Nuup mittarfianut tunniunneqarpoq.
Pitsaassutsinut pisortaq Jesper Lynge-Krog: ”Nuup mittarfiata iliuuserisai pitsaalluinnartuusimapput. Arlaannik iliuuseqarfigisassat takkukkaangata assupilussuaq qisuariallaqqissimapput.”
”Taakku ”pisussaqarfiit tamaasa” tikissimavaat, pitsaassutsimillu ulluinnarni suliaqarnermut naleqqiullugu pitsaasumik qanimullu suleqatigiittoqarsimavoq. Iluarsisariallit nassaarineqarsimasut isumaginissaannut sulisuminnik ilanngussuisimapput. Siulersuisut sulisuusullu akisussaaffimmik nammatassissimapput, tamarmillu arlaannik iliuuseqartoqassatillugu qisuariapallattarsimapput. Suleqatigiit pilluangaaritsi!”
