Mittarfiit nunarsuup sinnerani periarfissanut ammaassisuupput
Mittarfeqarfiit ukiut tamaasa Integra Aviation Academy suleqatigalugu AFIS´ilerisunik nutaanik ilinniartitsisarput iluminni ilinniarfiutertik Kangerlussuarmiittorlu aqqutigalugit. AFIS uannga tuluttuumiik naalisagaavoq Aerodrome Flight Information Service, tassanngalu ilinniagallit Mittarfeqarfiit tårniini silaannakkut angallattut tamakkiisumik nakkutigisaraat, timmisartortartullu paasissutissittarlugit toqqissisimasumik millutillu tingisinnaaniassammata. Kingulliit ilinniartut Oktoberimi aallartipput.
AFIS´ilerisutut ilinniarneq ukioq ilivitsungajak ingerlanneqartarpoq, ilinniartunut periarfissarpassuarnik peqalersitsisarluni. Ilinniarnertaa saakkortuukasiuvoq unamminartortarpassualik, ilinniakkamillu naammassinnuttunut, Mittarfeqarfinni atorfininnissaq qulakkeeriigaasarpoq. Mittarfeqarfinni sulineq unamminartutigut pissanganartuuvoq immikkoorutilinnik mittarfiutiminni atugassaqartitsisoq piginnaanngorsaqqinnissamullu periarfissarpassualik. Ilinniagaq flyvelederitut ilinniarnissamut alloriaataasinnaavoq ataatsimullu isigalugu mittarfeqarnerup iluani periarfissarpassuarnut ammaassisuusarluni. AFIS´ilerisutut allagartartaarsimasut arlallit, misilittagaqalernertik ilutigalugu Kalaallit-Nunaata avataani unamillernartunut, saassinnaalertarsimapput alloriaqqillutik.
”AFIS´ ilerisutut ilinniagaq nunarsuup sinnerata ilagaatsiarsuanut ammaassisarpoq. AFIS´ilerinikkuinnaanngitsoq, mittarfeqarnerup iluani sunulluunniit,” taama Glenn Lundt oqaluttuarpoq, taanna ullumikkut Koldingip eqqaanilu mittarfeqarnerup iluani pisortaavoq. Glenn Mittarfeqarfinni AFIS´ilerisutut aallartinnikuuvoq 2010´milu Koldingip eqqaatalu mittarfeqarnerata iluani pisortatut atorfinissimalluni. ”Atorfimmut piumasaqaataasimavoq, AFIS´ilerisutut ilinniagaqarsimanissaq, taannalu tunuliaqutaralugu mittarfimmi pisut tamakkerlugit ataatsimut pulaffigilluarsimasinnaanngorlugit. AFIS´ ilerisutut sulininni mittarfinni kiffartuuttakkatsinnut paasinnilluarsinnaalersimavunga piumasaqaataannillu naammassinnissinnaalersimallunga, taanna aqqutigalugu,” taama Glenn oqarpoq.
AFIS´ilerisunngorniat kingulliit Oktoberip ulluisa aqqaneq-aappaanni Kangerlussuarmi aallartipput. Paninnguaq Lynge, aallartittut ilaat ima oqaluttuarpoq ”suliassaasuanavianngilagut ilami ilinniagassagut sakkortupput, ilinniartitsisugulli piumassuseqaqaat kaammattuilluarlutillu, taannartaa uagutsinnut ilinnialersunut pikkunarpoq.” Paninnguaq neriuppoq siunissami Nuummi sulilernissaminut periarfissaqarumaarluni, tungaanut illoqarfinni allani aamma sulisinnaanissaminut ammavoq.
Ilinniakkamut tigutinnissamut misilitsinnerit aallartipput uge 33´mi ulluni sisamani ingerlanneqarlutik oqaloqatiginninnerit, simulatori atorlugu misileraatinneqarnerit, akunnernik sisamanik sivisussusilikkamik tuluttut, qallunaatut, matematikkimilu misilitsinneq kiisalu naliginnaasumik eqqarsartaatsimut misiliutit allassinnaanermullu misilitsinneq. Misilitsinnermi arfinillit angusipput ukiuunerani ukiup affaa atuartussanngortut. Ukiup affaani tassani immersorneqassapput tårnini suliassanik ingerlatsisinnaanngorlugit saniatigut simulatorini sungiusaatit atorlugit piginnaanngorsagaassapput, suliarisalerumaakkaminnut piareerluinnarnissaat angujumallugu. Ilinniagartik naammassigunikku, suliffittaartussat sinerissamut aallartinneqassapput sulilivitsinnatik piviusumi misilittaajartorlutik. Mittarfiit sisamat misilittaaffiusinnaasutut allagartaqartinneqartut tassaapput Ilulissat, Nuuk, Narsarsuaq Kulusullu.
”Nakkutigisassat nakkutigerpiaannagassaapput `hands-on`. Timmisartunut attaveqartarpugut mitsittarpagut mereeraagamillu ornittarpaatigut. Massakkorpiarpiaq pinera nuannarisarpara timmisartortartullu suleqatigiinnertaa aamma pissanganaraara,” taama Mortenip tårnimi sulinerminit oqaluttuarpoq.
AFIS´inngorniat Kangerlussuarmi kollegiami nutarsaqqammisumi najugaqassapput. Kollegiartaaq qaamasunngorlugu atortorissaarusersorlugu suliarineqarsimavoq.
