Mittarfeqarfinni pisortaaneq nutaaq
Ineqarnermut Attaveqaqatigiinnermullu Naalakkersuisoqarfimmit tusagassiorfinnut nalunaarut.
Naalakkersuisut aalajangerput, Henrik Estrup Mittarfeqarfinni pisortaanertut atorfimmik neqeroorfigineqassasoq. Henrik Estrup 1. juni 2019-imi atorfinissaaq.
Henrik Estrup ukiorpassuarni pisortatut misilittagaqarpoq, kingullermik Arssarnerit pisortaanertut atorfeqarfigisimallugit. Henrik Estrup siornatigut Nuuk Imeq A/S, Great Greenland A/S aamma Nukissiorfinni pisortaanertut atorfeqarsimavoq.
Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq:
“Naalakkersuisut Henrik Estrup Mittarfeqarfinni pisortaanertut atorfimmik neqeroorfiginiarlugu aalajangersimammata nuannaarutigisorujussuuara. Henrik Estrup pisortatut pikkorissuuvoq tunniusimasuullunilu, pisortatut sulineq misilittagaqarfigilluarlugu. Henrik Estrup-ip suleqatigillualernissaanut qilanaarpunga.”
Henrik Estrup tamatumunnga atatillugu oqarpoq:
”Mittarfeqarfiit Kalaallit Nunaanni suliffeqarfiit annersaasa ilagaat, Kalaallit Nunaanni angallannermut attaveqaqatigiinnermut tamanut annertuumik sunniuteqartoq. Siusinnerusukkut kalaallit suliffeqarfiinik angisuunik arlalinnik aqutsisuusarsimavunga, aammalu Mittarfeqarfinni sulisorpassuit pikkorissut, piginnaanillit tunniusimasullu suleqatigilernissaannut qilanaarpunga. Aamma suliffeqarfimmut piumasaqaatit ataatsimut isigalugit annertusinerisa, Kalaallit Nunaannilu mittarfiit nutaat sanaartorneqarnerisa kingunerisaannik suliffeqarfimmi allannguutissanut pisariaqartunut akuunissara qilanaaraara”.
Annertunerusumik paasisaqarusunnermi Ineqarnermut Attaveqaqatigiinnermullu Naalakkersuisup Karl Frederik Danielsenip allattaa Steve Sandgreen stes@nanoq.gl -ikkut attaveqarfigineqarsinnaavoq.
