Mittarfeqarfiit Visit Greenlandilu takornariaqarnikkut suleqatigiinnissamik isumaqatigiissusiortut

Mittarfeqarfiit Visit Greenlandilu suleqatigiinnerunissamik takornariaqarnikkut isumaqatigiissusiortut, paasissutissiisarnerup nunatsinni mittarfinnilu kusassaanissap tungaatigut.

Mittarfeqarfiit Visit Greenlandillu suleqatigiinnialernerat Kangerlussuarmi misilittagarillualikkat tunngaviullutik pinngorpoq. Kattuffiit taakku marluk ungasinngitsumi iigarsuarnik kusassaanikkut suleqatigeeqqammerput nunatsinnut takornarissanik tikilluaqquserpalaartussatut isumalinnik. Atsioqatigiinnikkut isumaqatigiissusiornerisigut suleqatigiinneq piumasaqaatitaqalerlunilu siunertaqalissaaq, mittarfiit arlariit kusassarnissaanik siunertalimmik. Isumaqatigiissutip imarissavaa suliassat aningaasartuutillu qanoq agguataarneqassanersut kusassaareernerullu kingorna kusassakkat qanoq aserfallatsaalineqassanersut.

Kusassaanissanik pilersaarusiat akisoorsuunngillat, amerlanertigummi kattuffinni pineqartuni sulisoreriikkanik suliaasartussaapput. Kusassaanikkut mittarfiit alianaanninngortinniarnerisa saniatigut takornarissat tikinneranni takusassinneqarusupput tikitaminni alakkartersinnaajumaagaannik qilanaartusaaserlugit.

”Alloriarnerup taamaattup takornarissanik orninneqarsinnaasut qilanaarutaasinnaasut suunerinik nittarsaassinermik aallarniineruvoq nunatsinnut tikittunut takujumaagaannut qilanaartereersinnaallugit ,” Mittarfeqarfiit avammut oqaaseqartartuat, Hans Henrik Lichtenberg taama oqaaseqarpoq.
Alloriarnissani tullinnguuppoq Ilulissani mittarfimmi kusassaanissat arlariiaat pilersaarusiornissaat siunissamilu ungasinnerusumi mittarfinni anginerusuniunerusoq, takornariarpassuarnik tikinneqarnerusartuni. Suleqatigiinnikkut kusassaanissani ataasiakkaani suleqatissarsiornissaq allanik nutaanik orniginartinneqarpoq. Assersuutitut taasinnaavarput Kangerlussuup mittarfiani Air Greenlandip kusassaaqataaqqammernera.

Tanny Por, Visit Greenlandimi content manegeritut atorfilik, ima oqarpoq:
” Visit Greenlandimut pissusissamisoorlunilu pingaarutilerujussuuvoq kikkuugaluanilluunniit takornariaqarnikkut sullisserusuttunik suleqateqartarnissaq. Taamaakkaanni angusaqaataasinnaasunik suleqatigiissuteqarsinnaanermik periarfissanik ammaassinermi saniatigut pilersaarusiukkanik annnertuunik aningaasatigullu killilersuiffiuallaanngitsunik suliaqarsinnaanermittaaq ammaassisarput. Tamanna apeqqusiineq ajorpoq takornariaqarnikkut suliaqartuunersut imaluunniit illoqarfimmut tamarmut kusassaanikkut ingerlatsiviunersut soorlu inuinnaat suliniaqatigiit ingerlassaat Colourful Nuuk assersuutigalugu. Mittarfeqarfiit suleqatigiissutiginninnerat assersuutitsialattut taaneqarsionnaavoq qanoq suleqatigiilluarnikkut angusaqarluartoqarsinnaaneranik. ”