Mittarfeqarfiit orsussamut akigititani aamma apparpai
Polaroilip orsussamut, timmisartumut orsussaq ilanngullugu, akigititani appartimmagit Mittarfeqarfiit aalajangerput orsussamut akigititatik aamma apparniarlugit. Mittarfeqarfiit timmisartumut orsussamik, benzinamik, dieselimik petroliumimillu tunisaqartarpoq, taamaalilluni timmisartuussisartut pisisartugullu allat aamma akit apparnerannik nuannaarutissaqassapput.
– Nuna tamakkerlugu mittarfiuterpassuatsinni helikopterinullu mittarfiutitsinni atuisunut sapinngisamik pitsaanerpaamik atugassaqartitsinissarput kissaatigaarput. Orsussat akiisa apparnerat sullitatsinnut iluaqutaassaaq, Jeppe Jensen, Mittarfeqarfinni niuernermut pisortaq oqarpoq.
Orsussamik appaaneq 10. marsi 2018-imit atuutilerpoq.
Paasisaqarnerorusuttut attavigisinnaavaat Svend Christiansen, Mittarfeqarfinni ineriartortsitsinermut pisortaq, oqarasuaat +299 52 42 45.
