Mittarfeqarfiit Kulusummi aalisartunik piniartunillu oqaloqateqalersut

TUSAGASSIUUTINUT NALUNAARUT

Siorna decembarip aallartisimalernerani Kulusummi ajutoortoqarneragut dieseluulia 120.000 liiteri tankimiit nunamut qerisumut aniavoq.

Naapilluni ajutoornerup kingunerisaasalu oqallisiginissaannik kissaateqarlutik, najukkami aalisartut piniartullu peqatigiiffiat KAPP, Kulusummi nunaqarfimmi siulersuisut KNAPK-lu peqatigalugit, Mittarfeqarfinnut saaffiginnipput.

Taama kissaateqarneq Mittarfeqarfiit akueraa sapaatillu akunnerata tulliani ataatsimoorluni oqaloqatigiinnissamut KAPP Kulusummilu nunaqarfiup siulersuisui qaaqqullugit.

– Piniartut, aalisartut nunaqarfimmilu najugallit oqaloqatigerusoqaagut. Taarsiiffigitinnissamut avatangiisinillu mingutsitsinermut tunngatillugu naalaarusuppagut suleqataarusullutalu. Taamaammat oqaloqatigiinnissamut paasissutissiinissamullu qaaqqusivugut, Mittarfeqarfinni ingerlatsinermi pisortaq Niels Grosen oqarpoq, imalu nangilluni:

– Pisoq assut ilungersunartutut isigaarput sapinngisarpullu tamarluinnaat pinngortitamik, uumasunik inunnillu ajoqusiineq anikinnerpaatinniarsaralugu.

Uuliamik aniasoqarnera 2022-imi decembarip ulluisa aappaanni paasineqarmat, Mittarfeqarfiit kommunimi upalungaarsimatitat isumasioqatigalugit, ingerlaannaq dieseluuliap aniasimasup killilersorlugulu milluarneqarnissaanut aallartitsisunik upalungaarsimatitaqalerpoq.

46.000 liiterimik milluaaneq upalungaarsimasut iluatsippaat, nunamili immamilu, siku apullu silallu ajornera pissutaallutik annertunerusumik iliuuseqarniarneq killeqarpoq.

– Avatangiisinut Naalakkersuisoqarfimmiit ilitsersuutit tamaasa malippagut oqaloqatigiuarlugillu. Uuliamik aniasumik suli nakkutilliivugut ilaatigullu timmisartuaqqamik inuttaqanngitsumik (dronemik) pisoqarfiusumik nakkutilleeqataasussamik pisilluta. Tamatuma saniatigut NIRAS Greenland; avatangiisit pillugit siunnersortissatut pissarsiaraarput. Suliffeqarfik taanna nunatsinni uuliakoornermik misissuinernillu ukiut 20-it sinnerlugit misilittagaqarpoq, suliffeqarfillu uuliakoornermut tunngatillugu annaassiniarnermi ilinniarsimassutsikkut siunnersioqatigiinnikkut ikiuutissaaq, Niels Grosen oqaluttuarpoq.

KAPP Kulusummilu nunaqarfimmi aqutsisut peqatigalugit oqaloqatigiilluni ataatsimiinneq ingerlanneqassaaq pingasunngornermi februaarip ulluisa aallaqqaataanni, ullorlu taanna nal. 16 katersortarfimmi innuttaasunik paasissutissiinertalimmik ataatsimiisitsisoqassalluni.

Paasissutissat sukumiinerusut attaveqatigiinnermi pisortaq Malene Lynge mailikkut: male@mit.gl imal. oqarasuaatikkut: 58 39 09 attavigalugu pissarsiarineqarsinnaapput.