Mittarfeqarfiit illuutit atunngitsut tuniniarusuppaat
Aviisi Sermitsiaq internetsikkullu nutaarsiassaqartitsivik Sermitsiaq.AG ullumi allapput illuutinik aserfallassimasunik piserusullutik saaffiginnittunik Mittarfeqarfiit itigartitsisimasut. Tusarfiat oqarpoq ”MIT illunik iluarsaassinissamik atuinissamilluunniit pilersaaruteqanngikkaluarluni tunisaqarusunngilaq.”
Tamanna ilumuunngilaq.
Mittarfeqarfiit Namminersorlutik Oqartussat sinnerlugit illuutinik arlalinnik ilaatigut Kangerlussuarmi namminersorlutik inuussutissarsiuteqartunut tunisaqarnikuuvoq. Illuutinik tunineqarsinnaanngitsunik piserusuttunik Mittarfeqarfiit saaffigineqarnikuuvoq. Illuutip pineqartup aalajangersimasup ilaa nunaqarfimmik kiassarnermut atorneqarpoq.
– Illuutit atorneqaratik aserfallakkaluttuinnartut tunineqarnissaat Mittarfeqarfiit soqutigaat. Illuutinilli atorneqanngitsunik piserusullutik saaffiginnilussinnartoqarnikuunngilaq. Illuutit atorneqartut tunisinnaanngilagut mittarfimmik ingerlatsinermik suliaqarnitsinni pisariaqartikkatsigit, Mittarfeqarfiit pisortaanerat Marie Fleischer oqarpoq.
Mittarfeqarfiit Namminersorlutik Oqartussat suliffeqarfiutigaat namminersortitaq. Tamanna pissutigalugu illuutinik allanilluunniit tunisaqarniaraanni tamanna tamanut tuniniarneqarnissaa piumasaqaataavoq. Illuutinik atunngitsunik piserusuttoqarpat Kangerlussuarmi mittarfiup pisortaa Peter Høgh saaffigineqassaaq.
Paasisaqarnerorusukkaanni saaffigineqassaaq attaveqaqatigiinnermut pisortaq Paornánguaq Kleist oqarasuaammut +299 59 74 74 imaluunniit e-mailimut paok@mit.gl.
