Mittarfeqarfiit amerikarmiullu nutaamik isumaqatigiissusiorput
Ukiunut tallimanut atuuttussamik Mittarfeqarfiit 109th Airlift Wing-ilu suleqatigiissutissamik isumaqatigiissusiorput, taaneqartoq kingulleq tassaavoq, amerikamiut silaannakkut angallannermi upalungaarsimanermut tunngassunut timmisartortitseqatigiiffianut, New York National Guard-imut, atasoq. Isumaqatigiissummi pineqarput Kangerlussuarmi unnuisarfissianut tunngasut, kiisalu kiffartuussinerit allat assigiinngitsut.
109th Airlift Wing-ip Kangerlussuaq sullissinerminni aallaavissatut toqqarsimavaat, ilaatigut inissisimanera Sermersuarmut ungasinngimmat, kiisalu minnerunngitsumik Mittarfeqarfiit neqeroorutiminni unnuisarfissianut tunngasut kiffartuussinerillu allat asssgiiinngitsut ataatsimut kattutaarsimammagit iluatigalugit.
– 109th Airlift Wing-ip Mittarfeqarfiit Kangerlussuarmi kiffartuussilluarnerannik iluarinninnerat, taamalu isumaqatigiissummik sivitsuerusunnerat nuannaarutissaavoq. Ukiuni tulliuttuni tallimani isumaqatigiissuteqarnitsigut suleqatigiissimanerput pitsaasoq nanginneqassaaq, tamannalu Mittarfeqarfinni atuutsikkusutatsinnut tulluuppoq, tassalu sullissinitta pitsanngorsartuarnissaa sullitatsinnullu inuiaqatigiinnullumi naleqarnerulersitsinissaq. 109th Airlift Wing-ip Kangerlussuarmi inuiaqatigiinnut iluaqutaasumik akuunera innuttaasunut pitsaaqutaaginnarpoq, aningaasarsiornermut pisortaq Jeppe Jensen oqaaseqarpoq.
109th Airlift Wing-ip Kangerlussuarmi suleqateqarnermik iluarisimaarinninnera 2017-imi ukiaagaa ersarissivoq nunanit tamalaanit ilisimatusartunik Kangerlussuarmi sullissivimmi (International Science Support-center) pisortaq Chris Sørensen sullissilluarsimaneranut suliaminullu pikkorissuuneranut nersorniarneqarmat.
109th Airlift Wing-p National Science Foundation, NSF, kiffartuullugu sermersuarmi ilisimasassarsiortartut pisataannik sulisuinillumi sermersuarmi ilisimasassarsiortut sulliviinut assiginngitsunut, soorlu NSF-ip ilaanut Summit-imut assartuussisarpoq. Qallunaat sermersuarmi ilisimasassarsiortut sulliviat, EastGrip, aamma sullitanut ilaavoq.
109th Airlift Wing Straton Air Basemi angerlarsimaffeqarpoq, tassani pigineqarlutik timmisartorsuit assartuutit, C130 herculesit sisoraaserlugit atorneqartartut, aqqaneq marluk.
Paasisaqarusukkaanni attavigineqarsinnaavoq Mittarfarfeqarfiit attaveqarnermut pisortaat Paornánguaq Kleist, e-mail paok@mit.gl imaluunniit mobil +299 59 74 74.
Nunanit tamalaanit ilisimatusartunik Kangerlussuarmi sullissivimmi (International Science Support-center) pisortaq Chris Sørensen sullissilluarsimanerminut suliaminullu pikkorissuunerminut oktober 2017 nersorniarneqarpoq.
