Mittarfeqarfiit 2014-mi ingerlatsinikkut sinneqartooruteqalaaminersimavoq
Mittarfeqarfiit 2014-mut naatsorsuutaanni takuneqarsinnaavoq annikitsunnguarmik sinneqartooruteqalaaminersimasut. Naak mittarfinni suliassaalatsittoqaraluarsimasoq, angallattut ikilisimagaluartut unnuisarfinnilu unnuisartut ikileriapiloorsimagaluartut. Sinneqartooruteqaminernermut peqqutaavoq suleriaatsinik pitsanngorsaasimaneq sunniuteqarluartumillu suleqatigiitsitsisoqalersimanera. Assersuutitut taaneqarsinnaavoq timmisartut qulaattartut aatsaat taama, Mittarfeqarfinnuinnaanngitsoq Kalaallilli-Nunaannut tamarmut iluaqutaasunik, aningaasatigut isaatitsissutaallualersimammata.
Taamaalilluni 2014-mi Mittarfeqarfiit naatsorsuusiaani sinneqartooruteqaminertoqarsimavoq. Aningaasartuutinik eqqummaarilluni aqutsilerneq eqaatsumillu aaqqiinnerit kinguneqartitsilluarsimapput naak angallattut ikileqqissimagaluartut ukiumi uani naatsorsuusiorfimmi. Mittarfeqarfinni aningaasat kaaviiaartut mittarfinni sulianik, inunnillu angallattunik aallaaveqarluinnarput, isertitat angalanermi akiliutip akileraarutitaaninngaannersuummata.
Sinneqartooruteqartarnissaq namminerisaminik Mittarfeqarfinnut anguniagaanngilaq taama oqarpoq pisortaq Jens Lauridsen:
”Mittarfeqarfinni aningaasaqarneq ima inisseqqasussaavoq aningaasaqarnikkut isertitat akiliutillu imminnut tulluarsarsimanerisigut qulakkeerneqartussaavoq mittarfinnik atuineq atuisutsinnut akikinnerpaaffimminiitinneqarsinnaanissaanut. Suliffeqarfitsinni piviusumi atukkatsinnut nalimmassaaleruttorpugut ukiunulli siuliinut naleqqiullugu aningaasat kaaviiaartut ikilissapput. Pitsanngorsaanerup kingunerisaanik aaliangiusimavarput akileraarutitigut 2015-mi 14-misulli inissisimaannassalluta.”
Isertitaqaataanerpaanut ilaalluinnarpoq mittarfiup ammasarfiisa avataatigut timmisartunik qulaattoqarniartillugu ammatitsisarnigut minnissamut pisariaqartitsisoqalissagaluarpat piareersimatitaqarluta taakkulu ETOPS-ammatitsinernik taaguuteqarput. Kalaallit-Nunaata qulaani silaannaap qulaavaaneqarnerata nakkutiginerulernerata kingunerisaanik 2014-mi 10,5 mio. kr. miss. iluanaaruteqarsimavugut ukiunut siuliinut naleqqiullugu. Ulluinnarni atortussanik pisiortornikinninngorlutalu, atorfilittanut aningaasartuutikinninngornitta saniatigut avataaniittunik kiffartuussinitsigut isertitaqarnerulernerput kinguneqarluarsimavoq 2014-mi naatsorsuinitta takutimmassuk 8,3 mio.kr.-nik ilorraap tungaanut saatissimagaatigut.
Mittarfeqarfiup ukiumoortuik nalunaarusiaa 2014 uunga iserluni www.mit.gl atuarneqarsinnaavoq kalaallisut, tuluttut qallunaatullu.
