Kangerlussuup Katersugaasivia kommunemut atalerpoq
Ataasinngorneq februarip 23-iani nal. 16 katersugaasivik oqaluttuassartanippoq. Tassa Sisimiut Kangerlussuullu katersugaasivii atalermata. Pissusilersorneq nalliuttorsiorpaluttoq Qeqqata Kommuniata – Naalakkersuisullu politiikeriisa, innuttaasullu arlaqartut peqataaffigaat.
Nunaqarfiup siulersuisuisa siulittaasua Knud Olsen (S), Qeqqata Kommuniatalu borgmesteria Hermann Berthelsen (S) oqalugiarnerminni oqaatigaat Kangerlusuup Katersugaasiviata atajuarnissaa qilanaaralugu. Inuit soqutiginnittut, tassa Siulersuisut Kangerlussuup Katersugaasivia Mittarfeqarfiit suleqatigalugu 1997-imi pilersippaat. Mittarfeqarfiit illutaa ingerlappaat. Mittarfeqarfiilli illu iperartariaqalermassuk Qeqqata Kommuniata katersugaasivik tiguaa, siunissamilu ingerlanneqartuarnissaa qulakkeerlugu.
Illu 1954-imili sanaaq Katersugaasivittut atorpoq. Taamani SAS-imik KBH-miit Kangerlussuarmut, taavalu Los Angelesimut angalasut hoteliattut atorpoq. Kingusinnerusukkut illu amerikarmiut qullersaqarfiattut atorpoq, taamaammallu katersugaasivimmi taamani pissutsit misigineqarsinnaapput, init arlallit
amerikarmiut 1992-imi qimammassulli isikkoqarmata.
”Kalaallit Nunaata sorsunneq nillertumi inissisimanerata nunarsuatta oqaluttuassartaanut ilaatippaa. Tamannalu Kalaallit Nunaata oqaluttuassartaa pissanganarpoq. Kangerlussuaq oqaluttuamut tassunga attuumassuteqarpoq, tassami tamaanngaanniit radareqarfinnut pilersuineq ingerlanneqarmat. Radareqarfiillu marluk sermersuarmiittut. Tassunga atatillugu Kangerlussuaq sorsunnerup nillertut nillertuarnissaanut pingaaruteqartumik inissisimavoq.” Taamatut oqarpoq Sisimiut Katersugaasiviata pisortaa, Christine Løventoft.
Siulersuisut siulittaasuat Morten Nielsen katersugaasivik ingerlanneqartuarnissaa pillugu kommuni qutsavigaa. Mittarfeqarfiit ingerlatsisuisa pisortaa Niels Grosen aamma katersugaasivik ingerlanneqartuarnissaa pillugu qilanaartuutini oqaatigaa, Kalaallit Nunaatalu timmisartukkut angallannikkut oqaluttuassartaa atajuarnissaa qulakkeermat. Mittarfeqarfiit tamanna pingaartippaat.
Kangerlussuup Katersugaasiviata aaqqissuunneqarnera Sisimiut Katersugaasivianut atalissaaq. Ataqatigiilerneq periarfissanik nutaanik pissanganartunik ammaassivoq, tamannalu Sisimiut Kangerlussuullu ataqatigiinneranut nukittorsaassaaq. Katersugaasiviit nittartagaasa atanissaat, saqqummersitat,
atuarfeqarfinnullu kiffartuussinerit suleqatigiiffissat tamanut iluaqutaasussat ilagaat. Sisimiut Katersugaasiviat, Kangerlussuup Katersugaasiviata siulersuisorisimasai, Mittarfeqarfiit, nunaqarfiullu siulersuisui suleqatigiilluartuarnissat isumaqatigiissutigaat. Aammattaaq katersugaasiviup ikinngutaannik peqatigiiffimmik pilersitsinissaq pilersaarutinut ilaavoq, kikkullu tamarmik piumasut katersugaasivimmi suliassanik assigiinngitsunik peqataasinnaalerumaarlutik.
