”Flightseeing/Timmisartumik takornariartitsineq” eqqunneqavippoq
Timmisartuutileqatigiit minnerusut suleqatigissallugit assut Mittarfeqarfimmut pingaaruteqarpoq. Attaveqaqatigiilluarnissaq timmisartuutileqatigiinnut mikinernut pingaaruteqarpoq Mittarfinnut suliassanik sammisassanillu annertoqutaasarmat.
Siunissaq isigalugu pingaaruteqarpoq attaveqaqatigiinneq timmisartuutileqaqatigiinnut minnerusunut attatiinnarnisaa, tassami Kalaallit Nunaat nittarsaassinikkut kajuminarsarlugu timmisartuutileqaqatigiit anginerusut suleqatigilersinnaagatsigit, suleqatigiinneq amerlaqisutigut Mittarfeqarfinnut suliffeqarfittut siuariaataasinnaammat.
Airzafari 2008´mi asuli saniatigooralugu aallarnerpoq. Jens Ploug Larsen Bente Biilmannilu tamarmik Air Greenlandimi timmisartortartuusut, qulimiguulimmik takornariartitsisoqarsinnaanersoq aperineqaramik eqqarsarsimapput: ”Uffami ilaa?” Air Greenlandimik qulimiguulimmik attartoriarlutik, taamanikkut Sermitsialiarsimapput. Ikinngutaasa ilaat tusaneqillutik inniminneeriaramik, inniminneeqqittoqaqattaariarami iluatsilluartumik kinguneqarluni. Piffissap sivikitsuinnaap ingerlanerani timmisartortartut taakku marluk aallarneeqqullugit inanneqariaramik, taamaasigunik qulimiguulinnik attartorsinnaatitaanerat ingerlaannarsinnaanngussammat. Annertuninngornissaa imatut naatsorsuutigisimanngikkaluarpaat, kisianni takusinnaalersimavaat ”flightseeing/timmisartumik takornariartitsineq” periarfissaqarluartitsisoq.
2010-11´p nalaani qulimiguulinnik attartorsinnaaneq killeqalersimasimavoq taamanikkut aatsitassarsiornikkut oliasiornikkullu misissuisoqaqattaartoqaleruttornerata naligimmagu taamaalimmat Bente Jensilu namminerisassaminnik timmisartussarsiorsimapput. Copenhagen Air Taxi isumaqatigiissusiorfigisimavaat, timmisartuutitaartik P68 Partenavia paarissagaat, ullumikkut Bente takornariartitsisarfeqqaminni pisortaavoq, Jensi siunnersortaallunilu, kaptajniullunilu, tunisassiortuullunilu isumassanik nutaanik pissarsiortartuuvoq.”Inuunera tamaat misigisassarsiortuusimavunga, unali misigisassanut nutaarluinnarnut aallarniutaavoq,” taama Jensi oqaluttuarpoq.
Ukioq siulleq ingerlalluarsimaqaaq, aappaaguani timmisartorseqqissimapput, Ilulissaniik Kangerlussuarmiillu aamma angallassisinnaanngorlutik. Ilulissani qisuariaataat nuannersimaqaat tikilluaqqusaalluarsimaqalutik Bentekkut Jensilu oqaluttuarput. Mittarfeqarfinnik suleqateqarnertik unnersiutigaat oqaatigalugulu aallaqqaammulli taakku tungaanniik iluatsitsilluarnissaat pimoorullugu suliniutaaffigineqarsimasoq. Airzafari timmisartumik attartukkamik ukiorpaalunni Kulusumi Islandimilu taamattaaq timmisartuussisarsimapput, neriuutigaat siunissami uterfigeqqikkumaarlugu nutaanik aaqqissuussisimallutik.
Ingerlassinertik tamakkerlugu unammillernartissimavaat Airzafarimut timmisartortartunik naammattunik sulisoqarniarnertik. Taamaattumik 2015´mi Namminersorlutik Oqartussanut isumaqatigiissusiorsimapput Copenhagen Air Taxi aqqutigalugu timmisartortartunik ilinniartitsisinnaalernissaminnik, massakkumut kalaallit ilinniartut marluk ilinniakkamik aallartitsinikuupput. Taanna suliniutit nutaat arlariit ilagaat, kingullertigut Ilulissani utaqqisarfiliornikuupput Sisimiuni aamma angallassisarsinnaanissamik ammaassipput. Sisimiuni aallartitsigamilli oqarsinnaalersimapput Wauw, taama Jensi oqaluttuarpoq.
Airzafarimi aallussat kiffartuussissutit sinaakkutaat ukiuni arlalinngortuni Mittarfeqarfiit peqatigalugit ineriartuaartinneqarlutik allattugaasimapput, taakkulu tunngavissiilluarput suleqatigiinnerup ingerlaannarnissaanut annertusaavigineqarnissaanulluunniit. ”Ingerlassap uuma piviusunngortinniarniarnera annertusimaqaaq, tamannalu Mittarfeqarfiit suleqatigineratigut pivoq, assorsuaq suleqatigiilluarsimavugut ammaffigiinnaavissimavaatigut pilersinniarnera tamaat,” taama Bente oqaluttuarpoq. Atuisutta Airzafari nuannarersuaarpaat, neriuutigaarput ukiuni tullerni suli alutornarnerusunik neqeooruteqarsinnaassalluta. ”Sinnattoraarput Atlantikup avannarpasissua tamakkerlugu ingerlatsivigisinnaassallutigu, Kalaallit-Nunaat, Islandi, Savalimmiut Danmarkimilu, taama siunissami pilersaarutit eqqartornerini Jensi ilasivoq.
Foto: Airzafari
Foto: Airzafari
Foto: Airzafari
