DME – Maniitsoq

Teknikkikkut anigorniagassat Maniitsumi timmisartumik angallannermi akornusersuipput

Distance Measuring Equipment-imik (DME) taagorneqartoq, mikkiartornermi timmisartortartumut timmisartoq qanoq takitiginersoq paasititsisartoq, piffissami kingullertigut Maniitsumi ingerlasinnaasimanngilaq. Nutaaq tikittussaavoq, kisianni tikinnissaanut, misilerarneqareernissaanut aammalu timmisartut angallannerannut oqartussanit akuerineqareernissaanut piffissaq atorneqartussaalluni.

Piffissamik eqquisarnermut sunniissaaq

Distance Measuring Equipment DME tassaavoq raatiu atorlugu ingerlatitsinissamut atortoq nutaaliaasoq, mittarfinnut ataasiakkaanut immikkut naleqqussarlugu suliaasoq. DME-mik amigaateqarnerup kingunerisaanik timmisartortartut mittarfiup atortui mikkiartornermut periaasissat atorsinnaajunnaarpaat, kisianni mittarfimmut mikkiartorneq aatsaat inuttat isigisaminnik takunnissinnaallutik silamut tunngasut atuutsillugit pisinnaalluni. DME-mik amigaateqarnermi taamaalilluni timmisartornermi isumannaallisaaneq sunnerneqanngilaq, kisianni taamaallaat mittarfimmi piffissamik eqquisarneq sunnerneqarluni.

Mittarfeqarfiit nalunaarasuartaateqarnermut teknikkinut immikkoortortaqarfia piffissami kingullertigut DME aserorsimasup ajornartorsiutaanerata aaqqiiviginissaanut tamakkersorluni sulisimavoq, kisianni ajoraluartumik DME maannakkut atorneqartup iluarsaanneqarsinnaannginnera paasinarsisimalluni. Taamaattumik nutaarluinnarmik inniminniinissaq pisariaqarsimavoq.

• Atortut immikkuullarissut nutaaliaasullu, pissarsiarinissaannut, ikkussornissaannut atulernissaannullu piffissamik atuiffiusussat, tassani pineqarput. Allatut oqaatigalugu suliap ingerlanera pisariusuuvoq. Soorunami tamatuma qaammatini aggersuni isikkivilutsillugu Maniitsumi timmisartumik angallannermut sunniisussaanera uggoraarput, kisianni tamatuma iluarsinissaa sapinngisarput tamaat sukkanerpaamik sulissutigaarput, taamaalilluni timmisartumik angallanneq nalinginnaasunngoqqissinnaassammat, oqarpoq Mittarfeqarfinni ingerlatsinermut pisortaq, Niels Grosen.

Mittarfeqarfiit naatsorsuutigaa, DME nutaaq kingusinnerpaamik martsimi ingerlalissasoq.