Sulisut qanoq oqarpat?

Lasse indsatslederinngornissamik pimoorussivoq

Lasse Harder 1. septembari 2019-imi indsatslederinngorniatut aallartippoq.

”Aappaagu 2021-mi ilinniarnera naammassissallugu naatsorsuutigaara. Nerlerit Inaanni suliffimmi sungiusarnera aallartilluarpara.”

Tunumi Nerlerit Inaanni 10-12-it allat peqatigalugit Lasse Harder sulisuuvoq. Ukiuunerata nalaani marlunngornerit sisamanngornerillu tamaasa Islandimit timmisartut takkuttarput, aasaaneranilu ullut tamangajaasa timmisartut takkuttarput. Turnusimik ingerlasaqarpoq, suliffimmi sap. akunneri 12-it angerlarsimaffimmilu sap. akunneri sisamat paarlaassiffigisarlugit.

Lasse Harder terminalimi sulisutut sulivoq, tamaanilu ingerlattakkat naqqaniit ilinniagaqarfigai.

”Tassaapput timmisartut orsersorneri, nassatanik isumaginninnerit, aputaajaaneq, ikuallattoornerissamut upalungaarsimaneq, suliassallu takkussuuttartut. Tassaavormi asimi mittarfiusoq, taamaattumillu suut tamaasa nammineq isumagissavagut, kikkullu tamarmik ikiuuteqataasarput. Neriuutigaara ingerlatakka ingerlallualereerpata sapissanangit ajussanngitsunik annertunerulaanik ilinniagaqassallunga, ajornanngippallu timmisartoqarfiup pisortanngornissaq siunertaralugu.”

”Periarfissarpassuit takusinnaagakkit ilinniagaq taanna toqqarpara. Arlalissuit ilinniarpakka, naammassereerumalu periarfissarpassuit takusinnaavakka. Pitsaanerpaaq tassaavoq ilinniagaqarneq tamatigoortoq.”

Lasse Harder siusinnerusukkut Nuummi EMJ Atconimi toqqorsiviup pisortaatut sulisimavoq, aammalu suliffigisimavaa Nuup kujataani rubinisiorfimmi HSEQ manageritut sulineq, tassani Peqqinnissaq, Isumannaallisaaneq, Sullivimmi Isumannaatsuutitsineq, kiisalu Pitsaassuseq akisussaaffigisimallugit.

”Inuusuttuaraajunnaarpunga, taamaattorli arlalinnik misilittagaqartarsimallunga, tamakkulu ulluinnarni sulininni atorsinnaavakka. Uannut tamaviaarnarnerpaaq tassaavoq atuarfimmut uteqqinneq. Ukiorpassuanngorpummi, taamaattumillu puigukkat eqqaaqqinniagassaapput.

Pimoorussiffigaarali, sapinngisaralu tamaat iliorpunga.”

Ilinniakkani naammassiniarsaraa, aammalu assingi nangeqqinniarpai.

”Uannut assut piumasaqarfigaanga, taamaattumillu indsatslederinngorumut tassunga marriinnarnissara naatsorsuutiginngilara. Assigiinngissuteqarnissamut periarfissaqarpoq, inuillu iliuuseqarusuttut pisariaqartitaapput.”

Jokum Mikaelsen
Kulusummi terminaalimi sulisutut ilinniartoq

Mittarfik Kulusummi terminaalimi sulisutut ulloq 16. september 2011 aallartippunga. Ilinniarneq ukiunik pingasunik sivisussuseqarpoq, paarlakaajaallugulu Nuummi Saviminilerinermik Ilinniarfimmi kiisalu Mittarfik Kulusummi sulinermik sungiusarnermik sulinermillu ingerlanneqartarluni. Sulinertaa pitsaanerpaajuvoq ullullu tamaasa atortutsinnik sulineq nuannarinerpaavara. Atuarfik pissanganannginnersaagunarpoq, tamanna nassuerutigisariaqarpara, naammassinissannullu qilanaarpunga.

Knud Olsen

Formandi, Entreprenørinut immikkoortortaqarfik, Kangerlussuaq

Maani ukiuni 19-ini sulinikuuvunga automekanikeritullu ilinniarsimasuullunga. Suliassat agguataartarpakka sulinermilu skiimat sapaatip akunnerini arlalinni atuuttussat kiisalu uuliamik peqassuseq, imeq, biiliussineq, soorlu assersuutigalugu eqqakkanut tunngatillugu aggeqqusinerillu pillugit naatsorsuutit suliarisarpakka. Nammineerlunga sulisarpunga ukiualunnilu sulilluarnikuuvunga, tunngaviusumik aqutsisutut ilinniarlunga assigiinngitsunillu pikkorissartarlunga. Ataatsimut isigalugu maani pikkorissarnissamut pitsaasunik periarfissaqarpoq.

Karo Jerimiassen
Hotelip saaffiginnittarfiani aqutsisup tullia

1981-imi maanga pivunga inilerisutullu sulilerlunga – taamanikkut Illersuisut hotelimik piginnittuupput. Mittarfeqarfiit 1992-imi hoteli tiguaat. Tamatuma kingorna cafeteriami, ataatsimeersuartunik ataqatigiissaarisutut, saaffiginnittarfimmi sulisutut kiisalu alarmcentraalimi sillimaniarnermilu oqarasuaaserisutut sulisimavunga. Nuannersorujorujussuarnik suleqateqarpunga – immitsinnut qanittuararsuuvugut. Feeriarlunga aallaraangama, pinngortitamut ikinngutinnullu uteqqinnissara qilanaarisarpara.