Terminalarbejderi

Terminalarbejderinngorit – nuannersumik assigiinngissitaartumillu suliffeqalerit

Mittarfeqarfinni terminalarbejderitut ilinniartunngorniarlutit qinnuteqarsinnaavutit. Malittarisassat atuuttut naapertorlugit ilinniareernerpit kingorna terminalarbejderitut atorfinissinnaasunngorlutit praktikkernissannut isumaqatigiissummik neqeroorfigisinnaavatigit. Atorfinitsitaaguit, ingerlaavartumik ilinniaqqinnissannut periarfissaqassaatit.

Ilinniarnerpit ingerlanerani makku ilinniassavatit:
• Timmisartulerineq
• Mittarfimmi suliaqarneq, tamatumunnga ilanngullugu aputaajaaneq
• Qatserineq, annaassiniarneq kiisalu imaani annaassiniarneq
• Sillimaniarnermut tunngasunik suliaqarneq

Taakkua saniatigut biilersinnaanermut truckinillu ingerlatsisinnaanermut allagartartaassaatit, nassiussanik ulorianartunik imalinnik suliaqarsinnaanermut allagartartaarlutit pisariaqassappallu Mittarfeqarfiit mittarfiini suliassanik ingerlatsinissamut pikkorissarnerit.

Naatsorsuutigaarput ima ittuusutit:
Ilinniartutut tigutinniaruit, Meeqqat Atuarfianni Inaarutaasumik (FSA) soraarummeersimassaatit naammaginartunillu angusaqarsimassallutit. Taassuma saniatigut ima ituunissat naatsorsuutigaarput:
• Minnerpaamik 17-inik ukioqartutit sulinermillu misilittagaqartutit
• Suliartortuaannartuusutit, takujuminartuusutit sullissillaqqitsuusutillu
• Nukittuumik timeqartutit peqqissutsikkullu piumasaqaatit arlallit naammassisinnaagitit
• Tamanit ataatsimut isiginnissinnaasutit pitsaasunillu suleqatigiinnermut piginnaasaqartutit
• Sillimaniarnerup tungaatigut politiinit akuersineqarsinnaasutit

Ilinniarneq pillugu paasissutissat:
Ilinniarneq paarlakaattumik Saviminilerinermut Ilinniarfimmi Nuummiittaumi Mittarfeqarfiillu mittarfiini ingerlanneqartarpoq. Ilinniarneq ukiunik pingasunik sivisussuseqarpoq. Ilinniarneq augustimi aallartittarpoq,  qinnuteqarnissarlu 15 maajimut killeqarluni. Ilinniartunngornissannut tigutissaguit, atorfinitsitaanissamut oqaloqatiginnissaatit piginnaasatillu pillugit misilitsillutit.