Allaffissorneq

Allaffissornermi ilinniartunngorit – inuussutissarsiorlutit sulinerit uani aallartiguk

Mittarfeqarfinni ilinniartoqarfiit suleqatigalugit allaffissornermi ilinniartuuteqarnissamut inissat arlallit pigaagut. Suliffiuvugut angisooq, taamaattumillu suliassat assigiinngitsorpassuit suliarinissaannut periarfissaqarputit. Imaluunniit TNI-mi imaluunni akademimik ilinniarneq aallartinniarukku, allaffissorneq, aningaasarsiorneq imaluunniit ussassaarineq toqqarsimallugu, taava Mittarfeqarfinni praktikkersinnaavutit.

Ilinniarnerpit ingerlanerani makkua ilinniassavatit:
Uatsinni ilinnartutut ilaatigut allaffissorneq, naatsorsuuserineq, sullitanik sullissineq, aningaasaqarneq, ussassaarineq kiisalu pisiortorneq tuniniaanerlu ilinniassavatit. Immikkoortortaqarfiit assigiinngitsut arlallit ilinniartuuffigissavatit, soorlu HR-imut immikkoortortaqarfik, aningaasaqarneq, tuniniaaneq, attaveqatigiinneq, sullitanik sullissineq aamma IT.

Naatsorsuutigaarput imaattuussutit:
Ilinniartunngussaguit Meeqqat Atuarfianni Inaarutaasumik soraarummeersimassaatit (FSA) naammaginartunik angusaqarlutit.
Taassuma saniatigut imaattuussasutit naatsorsuutigaarput:
• Sullississaqqissutit ammasuullutillu
• Nammineerlutit sulisinnaasutit suliassaqarfiillu akimorlugit sulisinnaasutit
• IT-p sulinermi atornissaa kajumissuseqarfigissavat
• Nutaanik ilinniarnissannut kajumissuseqartutit

Ilinniarneq pillugu paasissutissat:
Ilinniarnerup ingerlanerani atuarfik praktikkernerlu paarlakaajaallugit ingerlassaatit. Ilinniarnerup suunera apeqqutaalluni ilinniarneq ukiunik marlunnik sisamanillu sivisussuseqarpoq. Soorlu assersuutigalugu TNI-mi ilinniarneq ukiumik ataatsimik atuagarsornermik aallartinneqassaaq tamatumalu kingorna ukioq ataaseq praktikkerlutit. Tamatuma kingorna ilinniarnermi ukiut kingulliit marluk pingasoriarlutit atuarfimmiissaatit pingasoriarlutillu praktikkerlutit. Ilinniarnerpit nalaani isumaqatigiissut atuuttoq naapertorlugu praktikkernerpit nalaani ilinniartutut aningaasarsiaqassaatit.