Narsarsuaq
1942-mi timmisartoq siulleq Narsarsuarmut mippoq. Amerikamiut mittarfik sakkutooqarfittut suliaraat sorsunnersuarmi kingullermi mittarfittut aqqusaartakkatut. Sakkutooqarfimmi ulapaarfiunerpaap nalaani inuit tusindtilikkaat najugaqarput. Ullumikkut najugaqavissut 150-it aamma 200-ut akornanniipput.
Narsarsuarmi sammisassat
Peqatigiiffik Klubben assigiinngitsunik aaqqissuisarpoq arfininngornermi unnukkut qitittoqartarlunilu imigassallertoqartarluni. Klubbenimiipput aamma billiardertarfik, dart eqaarsaarfinnguarlu. Narsarsuarmi aamma timigissartarfeqarpoq tamanit atorneqarsinnaasumik. Inuit namminneerlutik aamma sammisassarsiorsinnaapput. Ilaatigut isikkamik arsartoqarsinnaavoq (silamiippoq ujaraaqqanik arsaattarfik), aalisariartoqarsinnaavoq, inuit ilaat sapaatit akunnerisa naaneranni nallukattartitsisarput, mittarfillu takuniassallugu pissanganarsinnaavoq, timmisartummi assigiinngitsorpassit mittarput. Napparsimaveqarfikumut pisuttuarnissaq sermersuarmillu takusaanissaq innersuussassaqqippoq. Narsarsuaq sammisassallu pillugit atuaruk visitgreenland.com
Niuerniarnissamut periarfissat
Narsarsuarmi niuertarfeqarpoq ulluinnarni atugassanik nioqquteqarluni. Saaffiginnittarfimmi sukkulaatinik, sodavandimik assigisaannillu pisiniarsinnaavutit.
