Ilinniarnerup ingerlanera

Narsarsuarmi Mittarfeqarfiit iluani ilinniarfimmi ilinniassaatit. Atuagarsornertaa ukiakkut aallartittarpoq upernaakkullu naammassilluni, kingornalu nunatsinni mittarfimmi sulinermik sungiusartoqarluni. Ilinniarnermi atuagarsorneq sungiusarnerlu katillugit qaammatinik 9-10-nik sivisussuseqarpoq. Ilinniartitaaneq sakkortuutut pisariusutullu ilisimaneqarpoq. Tamannali pissutissaqarluarpoq: Silaannakkut angallannermi isumannaatsuunissaaq pingaartinneqarnerpaavoq, taamaattumik AFIS-operatørit pikkorissuullutillu ilinniarluarsimasuusariaqarput.

Ilinniarfimmi ilinniartuuneq
Ataasinngornermiit tallimanngornermut ullormut akunnerni arfineq pingasuni 45 minutsikkaarlugit agguarneqarsimasuni ilinniartassaatit. Ullup qeqqanut akunnerup ataatsip missaani ulloqeqqasiortarpugut. Aamma ilinniagassaqartarpoq allatassaqarlunilu. Angusaqarluassaguit ilungersornissat naatsorsuutigisariaqarpat ilinniarnerillu nammineq akisussaaffigalugu.

Ilinniarnermi angusissagaanni suut piumasaqaataappat?
Ullut tamaasa piffissaq eqqorlugu atuariartussaatit, pinngitsoornak takkuttussaagavit.

Ilinniarnerup ingerlanerani soraarummeernerni pingasuni angusinngitsoorsinnaavutit.

Simulatori atorlugu sungiusarnermi piginnaasaqartutut nalilerneqassaatit kingornalu AFIS-imik mittarfiit ilaanni sulinermik sunigusarlutit, tassani aamma ilinniakkatigut akuerineqassallutit.

Peqqissutsimut misilitsinneq Class 2 pigissavat. Taamaattoq Danmarkimi silaannakkut angallannermi aqutsisoqarfimmi nakorsamit pineqassaaq.