Akeqanngitsumik internetsi nittartagarlu nutaaq
Mittarfeqarfiit maanna Kangerlussuarmut angalasunut akunnittunulluunniit akeqanngitsumik internetsimik sukkasummik atuisinnaaneq neqeroorutigilerpaat.
Attaveqaat MIT FREE WIFImik taaguuteqartoq, maannalu qaammat ataaseq missaani misiliutitut atorneqareersoq, tassaavoq attavik sukkasooq (100 Megabit), atuisut tamarmik avitseqatigiiffissaat. Tamanna qassit ataatsikkut atuinerat apeqqutaalluni sukkassusaata sunnerneqarsinnaaneranik isumaqarpoq.
Taamaakkaluaq attaveqaat internetsimut attavinnit nunatsinni ullumikkut pisiassaasunit amerlanernit sukkaneruvoq.
– Angalasunut Kangerlussuarmiittunut akeqanngitsumik internetsersinnaanermik neqeroorsinnaalernerput nuannaarutigaarput, teknikkeqarnermut immikkoortortami pisortaq, Mike Sanimuinaq Kristiansen oqarpoq nangillunilu:
– Tamatuma peqatigisaanik nittartakkamik paasissutissiivimmik, Air Greenland suleqatigalugu, ilaasunut Kangerlussuaq pillugu imalt. angalaneq pillugu naapertuuttunik paasissutissiisinnaanermik – pingaartumik attaveqatigiinnermut immikkut ittunik annertuunik piumasaqaatitalinnik pisoqartillugu- neqeroorsinnaanngortitsisoq saqqummiupparput.
Taamaallaat mittarfiup illutaani internetsimut attaveqartoqarsinnaavoq.
Akunnittarfimmi unnuisunut internetsimut attaveqaat akeqanngitsoq atuisullu amerlassusaannit sunnerneqartanngitsoq suli neqeroorutaavoq.
Kangerlussuarmi mittarfimmi sumi tamaani nittarsaassissutinik QR-imik ilisarnaatilinnik angalasut mobilertik atorlugu scannersinnaasaannik, taamaalillutillu isumaminik akeqanngitsumik wifi-imut attaviliisunik ikkussuisoqarpoq. Tamatuma kingorna nittartakkamut Kangerlussuaq pillugu paasissutissiisumut ingerlateqqiisoqassaaq. Nittartagaq attavik una aqqutigalugu aamma alakkarneqarsinnaavoq: www.bgsf.gl
Paasissutissat sukumiinerusut attaveqatigiinnermi pisortaq Malene Lynge mailikkut: male@mit.gl imal. oqarasuaatikkut: 58 39 09 attavigalugu pissarsiarineqarsinnaapput.
