2015-imi Ukiup Mittarfia
Ileqquusartut malillugit pisortat isumasioqatigiinneranni ulloq kingulleq akissarsititsisoqarpoq. Pissangasoqartoq malunnarpoq aammalu akissarsiarititassat assigiinngitsut agguaanneqarmata malunnartumik tulluussimaartoqarpoq.
Siullermik pingaarnertullu ukioq manna ukiumi mittarfimmut akissarsiarititassaq Aasiaat Mittarfiannut tunniunneqarpoq. Mittarfimmi pisortap Bo Qvist-ip akissarsiarititassaq pisortamit Jens Lauridsen-imit tunniunneqartoq tiguaa. Akissarsiassaq, mittarfimmut nikeriarsimasumut aammalu ukiup ingerlanerani pitsaasumik ineriartortitsinermik ingerlatsisimasumut, tunniunneqassasoq pingaartinneqarpoq.
”Inussuk-mi ingerlatatsinnit sakkussanik atuisimaneq aammalu ulluinnarni sakkussanik atuilersimaneq toqqaaniarnermi pingaartissimavara. Bo Aasianni taamaaliorsinnaasimavoq aammalu ajornartorsiutit ulluinnarni pilertartut aaqqiissutissarsiniartarnerat pikkoriffigisimallugu. Missingersuutit iluanni aningaasaqarnermik aqutsineq pikkoriffigisimavaat aammalu Aasianni sulisoqarpoq tulluussimaartunik naammagisimaarinnittunillu. Mittarfik immikkoortortatut ataatsimoortutut ingerlanneqarpoq,” akissarsiassap tunniutinnginnerani Jens oqarpoq.
Ukioq manna Mittarfitsialammut aammalu pitsaasutsimut akissarsisut Bo Qvist aamma Bo Olsen nuannaaqisut
Ukioq manna mittarfimmut akissarsiarititaq tassaavoq pokali ingerlaartoq, ukiut tamaasa mittarfimmut ukiup siuliani immikkut maluginiarneqartunik iliuuseqarsimasumut tunniunneqartartoq. Akissarsititsisarnermut tunngaviusussanik tunngavissarititaasunik aalajangersimasunik aalajangersagaqanngilaq, aalajangiineq Mittarfeqarfinni pisortat mittarfinni 13-iusuni ukiup ingerlanerani ataatsimoortumik nalilersuinerinik aallaaveqartarpoq.
Ukioq manna pitsaassutsimut akissarsiassaq Sisimiut Mittarfianut tunniunneqarpoq aammalu Bo alla, mittarfimmi pisortaq Bo Olsen, akissarsiassamik tigusisuuvoq. Pitsaassutsimut pisortartaaq Per Hangaard akissarsiassamik tunniussisuuvoq, tassani piffissamut killissaliussat, pilersaarutit aamma mittarfimmi suliaqarnermi ullut killiliussat malinneqartarnerat immikkut pingaartinneqarluni. Paarlattuanik siusinnerusukkut pitsaassutsinut pisortaq Troels Arnkjær mittarfinnut pisortanit ukioq manna support-imik suliaqartarsimanermut akissarsitinneqarpoq.
Akissarsiassaq kingulleq ukioq manna immikkut tunniunneqartoq, Arctic Winter Games nalaani suliniuteqarnermut Kangerlussuaq qutsavigalugu, tunniunneqarpoq. Niels Grosen-ip akissarsiassaq taanna Mittarfimmi pisortamut Rita Müller-imut, Akunnittarfimmut pisortamut Morten Nielsen-imut aamma Akunnittarfimmi Inspektørimut Jeppe Nielsen-imut tunniuppaa. Taamatuttaaq unammiuaarnerit nalaanni annertuumik suliniuteqarsimanermut Nuummi Mittarfik qutsavigineqarpoq.
