Mittarfeqarfiit 2023-imi unnummi kulturisiorfimmi nunap immikkoortuini tamani peqataassapput
Mittarfiit tallimat heliportilu ataaseq, ukioq manna arfininngornermi januaarip ulluisa 21-ianni unnummi kulturisiorfimmi tamanut ammassapput.
Upernavimmi, Ilulissani, Nuummi, Paamiuni Tasiilamilu soqutiginnittut tamarmik Mittarfeqarfiit suliffittut iserlugu misigisassarsiorffigisinnaavaat.
Tassani sulisut apeqqutinut akisuteqarnissamut piareersimassapput, suliffimminnik atortuminnillu takutitsissallutik, ilaatigut qatserisoqassalluni, bamsinik scannerisoqassallunilu nalorsitsaarisoqassaaq.
– Kiisami ukiut marluk qaangiuttut matut ammaqqissinnaanissaat nuannaarutigeqaarput. Suleqaterpassuagut ukioq manna tamakkerlutik peqataasinnaanngikkaluit, nunap immikoortuini tamani peqataaneq tulluusimaarutigaarput, Mittarfeqarfinni attaveqatigiinnermut pisortaq Malene Lynge oqarpoq.
Takkuttut tamarmik nalorsitsaarinermi peqataasinnaassapput eqqugassanillu eqquisinnaassallutik, ussassaarutinittaaq agguaasoqassaaq. Ullormut angallanneq periarfissallu apeqqutaallutik qanoq pisoqarnissaanut najoqqutassat sumiiffinni assigiinngissuteqalaarsinnaassapput.
