Mittarfeqarfiit flyinfo.gl inerisarpaat
Nuummi, Kangerlussuarmi Ilulissanilu piffissami kingullermi mittarfinni isiginnaarutikkut paasissutissiivinni, timmisartut tikittussat aallartussallu pillugit paasissutissat allaanerusumik isikkoqarnerat takuneqarsinnaavoq. Tamanna Mittarfeqarfiit sullississummik nutaamik, piffissanik aallarfissanik tikiffissanillu takutitsisussamik inerisaalerneranik patsiseqarpoq. Ilaasunut ilusaa kisimi allaassuteqalaassaaq.
– Timmisartukkut angallanneq pillugu isiginnaarutitigut nittartakkatigullu (flyinfo.gl), aallartussat tikittussallu pillugit paasissutissat ilaasussanut pisariitsumik ataatsimut pissarsisinnaanissaat siunertaavoq, Mittarfeqarfinni attaveqatigiinnermi pisortaq Malene Lynge nassuiaavoq.
Nuna tamakkerlugu atorneqalissaaq
Mittarfeqarfiit timmisartuussinernut atatillugu paasissutissanut, sullississummik nutaamik, piffissami qanittumi nuna tamakkerlugu timmisartuussinerit pillugit isiginnaarutikkut paasissutissiivinni atulersussamik inerisaanerat, ilusaanik allannguinermut patsisaavoq. Nittartagaq flyinfo.gl Mittarfeqarfinnit pigineqarlunilu ingerlanneqarpoq piffissalli pillugit paasissutissat timmisartortitseqatigiinneerlutik.
– Mittarfeqarfiit mittarfinnik, aallartussanut tikittunullu isersimaarfinnik piginnittuummata, uagut piffissat aallarfissat tikiffissallu pillugit paasissutissanik ataatsimoortunik timmisartortitseqatigiinneersunik saqqummiussisuunissarput pissusissamisoortuuvoq – ilaasussanullumi allanullu, tikittussat aallartussalluunniit pillugit ujaasivissap ataasiinnaanissaa pisariinnerpaajussalluni, Malene Lynge oqarpoq.
Ilaasussanik susassaqaqatinillu allanik paasissutissiinerup saniatigut, paasissutissat aningaasaqarnikkut aqutsinermut sullitanillu akiligassiinermut atorneqartarput.
Nunaqarfinnut timmisartuussinerit takutinneqarsinnaanngikkallassapput
Sullississut nutaaq atulerpat aallaqqaammut nunaqarfinnut timmisartuussinerit takuneqarsinnaassanngillat. Sullississummi maanna atorneqartumi eqqortunik piffissaliiniarneq unammilligassaqarfiusimavoq. Taamaammat Mittarfeqarfiit Airgreenland-ilu suleqatigiillutik aaqqiissuteqarniarsaripput.
– Pifissami qanittumi aaqqiissuteqarsinnaanissaq naatsorsuutigaarput. Qulimiguulimmik timmisartuussinerni piffissat eqqortut takuneqarsinnaanngorniariarpata flyinfo.gl-imissaaq takuneqarsinnaanngussapput, tamatuma tungaanut Airgreenlandip nittartagaa innersuunneqarpoq, attaveqatigiinnermi pisortaq nassuiaavoq.
Sullississutip nutaap KNR-ip teksttv -ani paasissutissat ingerlaannaq nutartertassavai. Sullississutip nutaap inerisarneqarnerata saniatigut Mittarfeqarfiit aamma oqarasuaatitik atortorissaarutaat nutarterpaat aamma.
Oqarasuaatikkut sullississut nutaaq qanittuukkut atulersussatut naatsorsuutigineqarpoq. Tamatumunnga atatillugu tikilluaqqussut nutaaq normumut 70 16 00-imut atorneqalerumaarpoq, nuutsinneqarnissamullu imminut sullinnissamut periarfissat amerlanerit atuutilissallutik.
