Mittarfinni pingasuni qatserussuit nutaat

Qatserussuarnik nutaarluinnarnik pingasunik pisiffigisaq Østrigimeersoq Rosenbauer- tikikkuminaatsunut soorlu Nerlerit Inaannut Qaarsunullu, tikikkuminarnerusumullu Maniitsumut qatserussuarnik crash tenderinik taaneqartartunik Mittarfeqarfinnut tunniussivoq.

Rosenbauer qatserussuarnik pingasunik tunniussisoq
Rosenbauerip qatserussuarnik sungaartunik ilisimaneqarluartunik Mittarfeqarfinnut ilisarnaataasunik pisiffiusartup, ukiup tulliani qatserussuarnik nutaanik pingasunik tunniussinissaata isumaqatigiissutaanera pillugu, 2020-imi aasakkut pisortaaneq Henrik Estrup taamanikkullu pisiortornermi pisortaasoq nutaarsiassiipput.

– Qatserussuatoqqat ukiorpassuarni atorluarsimaqisut taarserneqartariaqalerput. Ukiut kingulliit marlussuit coronartoqarnera aningaasaqarnitsinnut sunniuteqarpoq Naalakkersuisuniillu ilassutitut aningaasaliiffigineqarnikkut qatserussuarnik nutaanik pisisinnaalersimavugut, taamaalillutalu ukiuni aggersuni amerlasuuni upalungaarsimanerput nukittorsarlugu, Henrik Estrup oqarpoq.

Maniitsoq siulliunneqarpoq
Qatserussuit Østrigimi sananeqartarput nunatsinnullu umiarsuakkut apuunneqarneranni, misilinneqarlutillu Angallannermut Aqutsisoqarfimmit akuerineqartinnagit, ikkussugassat kingulliit ikkussorneqartarlutik. Maniitsumi mittarfik siulliulluni qatserussuarmik nutaamik atuilerpoq.

– Qatserussuatta nutaap upernaakkut tikiunneqarnerata peqatigisaanik Østrigimi pisiffigisamit aallartitaq qanoq atornissaanik ilitsersuisussaq tikippoq, Maniitsumi mittarfimmi pisortaq Daniel Lyberth Nielsen oqaluttuarpoq.

Nerlerit Inaat Qaarsullu
Qatserussuit aappaat sikutinnagu Nerlerit Inaannut tunniunneqarpoq kingullerlu novembari naalersoq Qaarsunut tunniunneqarluni.

– Usingiarnermut prammi eqqortumik angissusilik pissarsiareqqaartariaqarmat, Qaarsunut tunniussinissaq kinguaattoorfiungaatsiarpoq. Utaqqingaatsiareernerup kingorna qatserussuup sivisuumik utaqqisimasatta tunniunneqarnissaa kiisami iluatsippoq, Qaarsuni mittarfimmi pisortaq, James Nielsen oqaluttuarpoq.

Eqqarsaatigilluaqqaarlugit aaqqiiviginiagassat

Ikuallattoornermut annaassiniarnermullu atortunik taarsersuineq ajornaatsuinnaanngilaq. Pisiffigisap pisortat piumasaqaataannik sakkortuunik eqquutitsinissaata saniatigut atortut nutaat atorneqarsinnaassappata, Angallannermut Aqutsisoqarfimmit sumiiffinni misilerarneqassapput akuersissutigineqassallutillu. Tamatuma saniatigut qatseralutillu annaassiniartartut atuinissaannut ilinniartinneqaqqissapput suliassarlu taannaannarluunniit ajornaatsuinnaasariaqanngilaq.

– Suliaq ajunngitsumik naammassisinnaajumallugu sorpassuarnik ataqatigiissaaringatsiartariaqarsimavugut, ingerlatsinermi pisortaq Niels Grosen oqaluttuarpoq imalu nangilluni:

– Sulisoqarnermut tunngatillugu sulisugut Qaarsuneersut Nerlerit Inaanneersullu pisiffigisap aallartitaanit ilinniartinneqarnissaat siunertaralugu Maniitsuliartissinnaannginnatsigik– aallartitarlu angalatissinnaannginnatsigu – Ilulissani ingerlatsinermi aqutsisutta ilinniarnissaa siunertaralugu Maniitsuliartipparput. Tamatuma kingorna Maniitsumi mittarfimmi pisortarput ilinniartitsiartortillugu Nerlerit Inaaliartipparput. Taamaaliornikkut katitertakkatullusooq ittoq naammassivoq, tamannalu tamatsinnut piffissamik aningaasanillu sipaarfiuvoq, Niels Grosen

 Biilit pisoqqat nutaallu
*Qatserussuit kingulliit marluk Nerlerit Inaanni Qaarsunilu atorneqarsinnaanngorlugit atortussanik annikitsunik ikkussuinissaq Danmarkimilu silaannakkut angallassinermi oqartussat akuersissuteqavinnissaat kiserngorupput. 2022-ip aasaani sumiiffinni akuersissutigineqarlutik qatserussuarnut allanut ullumikkut ukiunik 25-inik pisoqaassusilinnut ilanngunnissaat naatsorsuutigineqarpoq.

QATSERUSSUIT PILLUGIT PAASISSUTISSAT

• Mittarfeqarfinni qatserussuit sungaartut ilimaneqarluartut pisiffigisartakkamit Østrigimeersumit Rosenbauerimit tunniunneqarput
• Rosenbauer qatserussuarnik Mittarfeqarfinnut pisiniarfittut, silaannakkut angallannermi oqartussanit akuerisaavoq
• Qatserussuit svenskit lastbiililiorfiata tusaamasap ilisarnaataanik Scania AB-imik tunngavillit Mittarfeqarfinnut immikkut sanaajupput, Stiholtilu atortunik assigiinngitsunik ikkussuisuulluni
• Qatserussuaq 500.000 euro (3,7 mio. koruunit missaannik) naleqarpoq.