Kangerlussuup mittarfiani pisortaq nutaaq
Mittarfeqarfiit Kangerlussuarmi nutaamik mittarfimmi pisortamik atorfinitsitsivoq
Ivaaq Christensen, 33iinnarnik ukiulik, novembarip aallaqqaataani Mittarfeqarfiini mittarfiini pisortat akornanni nukarlersaajulluni mittarfimmi pisortatut atorfinitsinneqarpoq.
– Ivaaq pikkorissunik misilittagaqqortuunik sulisoqarlunilu nammineq inuusukkaluaqaluni piginnasaqarluarpoq, taamaattumik Kangerlussuarmi mittarfimmi aquut tigujumammagu assut nuannaarpugut, Mittarfeqarfiini ingerlatsinermut pisortaq, Niels Grosen oqarpoq.
Ivaaq Christensen Mittarfeqarfiini 2017mi kangerlussuarmi havnebetjentitut atorfinitsinneqaqqaarpoq qaammatilli pingasuinnaat qaangiummata mittarfimmi aqutsisutut atorfinitsinneqarpoq.
– Nunatsinnut isaariaattut Kangerlussuaq suliffigalugu nuannaralugu pingaaruteqartutut isigaara. Airgreenlandip tikittarnera saniatigut timmisartunit nunanit assigiinngitsunit tikeraarneqartarnerput assigiinngisitaartunik pissanganartunillu suliaqarnarpoq, Ivaaq Christensen oqaluttuarpoq.
Ivaaq politiitut ilinniagaqarsimavoq, 2017milu mittarfimmi aqutsisutut atorfinimmat taamani Kangerlussuup mittarfiani pisortaasimasoq Peter Høgh qanimut suleqatigisimavaa.
– Ukiuni tallimangajanni mittarfimmi aqutsisutut atorfeqareerlunga mittarfiup pisortaa qanoq pingaaruteqartiginersoq ilisimalluarpara. Ilisimasakka tamaasa Peter Høghimit ilikkarpakka. Petermut qujassutissaqaqaanga. Taannaqarsimanngitsuuppat ullumikkut pisortatut atorfittaarsimasinnaanngikkaluarpunga, mittarfimmi pisortanngorlaaq naggasiivoq.
Ivaaq Sisimiuni perioriartorsimasoq ataataavoq kisimiittoq marlunnik ernilik. Asimi angalaarumatuujullunilu piniariarumatuujuvoq.
Paasissutissat sukumiinerusut uunga pissarsiarineqarsinnaapput: attaveqatigiinnermut pisortaq, Malene Lynge, male@mit.gl, oqarasuaat: 58 39 09
