Mekanikeri

Mekanikerinngorit – suleqatigiilluartullu ilagilerlugit

Mittarfeqarfinni automekanikeritut lastbilmekanikeritullu ilinniartoqarsinnaavoq. Aqqut sunaagaluartorluunnit toqqarukku, mittarfimmi maskiinat immikkuullarissut suliarisassavatit. Mittarfiutigut aputaajaateqarput, assaateqarput, kraaneqarput, truckeqarput allarpassuarnillu maskiinaqarput, nammineerluta aserfallatsaaliortakkatsinnik

Ilinniarnerpit ingerlanerani makkua ilinniassavatit:
Mekanikerit ilinniarnerit tamatigoortuupput makkua ilinniassavatit:
• Biilernermik ilinniarneq
• Motoorit benzinatortut dieselitortullu
• Kallerup innerinut systemit
• Biilit sananeqqataat
• Bremsit, aquutit systemillu kallerup innitortut
• Ajoqutinik ujarlerneq qanorlu iluarsaassinissamut periutsit

Ilinniarnerup ingerlanerani pingaarnermi faagit tunngaviusut uku ilinniassavatit: Tuluttoorneq, materiaalinik paasinnissinnaaneq, avatangiisit, tuniniaaneq sullissinerlu, inuiaqatigiilerineq aamma aningaasaqarneq. Taakkua saniatigut faagit nammineq qinigassat ilinniarneqassapput. Ilinniarninnut atatillugu biilersinnaanerut allagartartaarnissannut periarfissaqassaat.

Ilinniarneq pillugu paasissutissat:
Mittarfeqarfiit ilinniartuuffissanik Saviminilerinermut Ilinniarfik peqatigalugu neqerooruteqartarpoq. Lastbilmekanikeritut ilinniarneq Skjern Tekniske Skolemi Danmarkimiittumi pisarpoq, automekanikeritullu ilinniarneq Kalaallit Nunaanni ingerlanneqartarluni. Ilinniarneq ukiunik sisamanik sivisussuseqarpoq ilinniarnerpillu naammassinerata kingorna immikkut ittumik ilinniaqqissinnaavutit biilinik misissuisartutut, produktionsteknologitut, maskinmesteritut imaluunniit diplomingeniøritut.