TUSAGASSIORFINNUT NALUNAARUT: Mittarfeqarfiit ukiumut angusaat pitsanngortut
Mittarfeqarfiit iluarisimaarnartunik angusaqarlutik ukioq 2019 qaangerpaat.
Ukioq manna angusat 2,3 millioner koruuninik amigartoorfiupput, 2018-imi 26,2 millioner koruuninik amigartoorfiullutik, aammalu nammineerluni aningaasaatit 23,3 millioner koruuninik amerlassuseqarput, 2018-imi 1.344,3 koruuninik amerlassuseqarsimallutik.
Kaaviiaartitat ilanngaasereerlugit ukiup siuliani 1,3 procentinik appariarput. Angallannermit isertitat 7,2 procentinik appariarput, tamatumunngalu pingaartumik aallartartut ammatitsisarnerillu amerlassusiisa ikilinerat peqqutaapput. Akunnittarfiit ineriartorneri kinguariarfiulaarput.
Ukiumoortumik naatsorsuutit pillugit inatsimmi aalajangersakkat atorneqalerneri tunngavigalugit suliffeqarfiup pigisai nalillit nalikilliliiffigineqarput, taamaalillunilu Mittarfeqarfiit isertitaqarnissamut periarfissaannut naleqqunnerulerlutik.
Naatsorsuutinut atatillugu pisortaaneq Henrik Estrup oqarpoq:
”Ukiumoortumik naatsorsuutit ulluinnarni nunatsinni sulisorpassuit annertuumik tunniusimalluarlutillu sulinerisa kingunerisaannik iluarisimaarnartumik pitsanngoriarput. Kisiannili 2020-mi, kaaviiaartitatigut isertitatigullu pitsaanngitsunik sunniuteqarfigisatsinni qanoq angusaqassanerluta nalorninartoqartipparput.
COVID-19-ip atuunnerani ilaasartut aallartartullu ikileriangaatsiarput, taamaakkaluartorli Kalaallit Nunaanni timmisartukkut angallassinerit qulakkeerniarlugit mittarfiit tamaasa ammatissinnaasimavagut.
Tamanna Mittarfeqarfiit akiliisinnaassusianut annertuumik artorsartitsivoq, aammalu tamanna tunngavigalugu Nunap Karsiani qaangiisinnaanerput qaffatsissimavarput”.
”Suleqatigut piginnaanillit ilinniarluarsimasullu atorlugit mittarfiit isumannaatsumik, sullitat siunnerfigalugit pitsaasumillu ingerlanneqarnissaat anguniarlugu sapinngisatsinnik sulinerput ingerlapparput”, Henrik Estrup oqarpoq.
2019-imi Mittarfeqarfiit sullisseriaatsinik nutaanik, ilaatigut HR-imi sullississummik nutaamik aamma pitsaassutsimik aqutsinermut sullississummik nutaamik atuutsitsilernermikkut suliffeqarfimmi pitsanngorsaasimapput nutarterisimallutillu. Isumannaannerusumillu timmisartuussinissamut tunngatillugu ilaatigut aningaasaliisoqarsimalluni.
Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq: ”Mittarfeqarfiit inuiaqatigiinni kalaallini pingaarutilimmik inissisimapput, aammalu Kalaallit Nunaanni suliffeqarfiit annersaasut ilagaat, illoqarfinnut nunaqarfinnullu siammarneqarsimasoq. 2019-imi angusat pitsanngoriarnerat iluarisimaarnartorujussuuvoq.
Kisiannili ukiumi nutaami kinguariaqqinnissarput naatsorsuutigisinnaavarput. COVID-19-ip sunniutai ersersimapput, Mittarfeqarfinnuinnaanngitsoq, aammali inuiaqatigiinnut kalaallinut tamarmiusunut. Tamatta nutaamik eqqarsartariaqalerpugut, aammalu iliuuserisartakkatsinnullu naleqqiullugu allaanerusunik iliuuseqartariaqalerpugut. Taamaakkaluartoq Mittarfeqarfiit suli mittarfinnik ingerlatsinermik toqqissisimanartumik pitsaasumillu ingerlatsinissamik qulakkeerisinnaapput, aammalu ilisimavara Namminersorlutik Oqartussat, Danmarkimi Angallannermut, Sanaartornermut Ineqarnermullu Aqutsisoqarfik, sullitat suleqaterpassuillu allat suleqatigisinnaagaat”, Karl Frederik Danielsen oqarpoq.
