Mittarfeqarfiit nunatta ilinniarfiisa annerpaat akornanniippoq
Mittarfeqarfiit Kalaallit Nunaanni ilinniarfiit annerpaat ilagaat. Ilinniakkanit arlalippassuarni suliffimmi sungiusartut saniatigut Mittarfeqarfiit namminneq ilinniagassaqarfissaqarput, taakkulu mittarfinnut najukkamit immikkut ilisimasalinnik ilinniagaqartitsiuarnissamik qularnaarisuupput. Tamanna nuna ataatsimut isigalugu Mittarfeqarfinnullu, ilinniartut nutaamik nalissaqanngitsumillu isumassarsiffissanik pissarsissutaasarput.
Mittarfeqarfiit assigiinngitsunik 15-it sinnerlugit amerlatigisunik ilinniarfigineqarsinnaavoq, agguaqatigiissillugillu suliffeqarfimmi sulisut 35-t ilinniakkamik ingerlassaqartarput. Mittarfeqarfiit taamaalillutik nunatta ilinniarfiisa annerpaat akornanniipput, suliassarlu taanna pimoorunneqarpoq. Mittarfeqarfiit siunissami eqqortunik sulisartoqarnissaat inuiaqatigiillu tamarmiusut ilinniarsimassutsikkut qaffassarnissaat qularnaarniarlugit sulisunik ilinniagaqartitsiniarneq ilinniarfinnillu suleqateqarneq eqqummartaarfigineqarput.
Ilinniagaqarneq tamanut iluaqutaasoq
”Mittarfeqarfiit pisortat suliffeqarfiutigaat, namminersortutulli suliffeqarfiusimagaluarutta ilinniagaqarneq toqqarniarsimassagaluarparput. Suliffimmimi sungiusartuuteqarneq pisarissersuutaasutut aningaasartuuteqarnertut isiginngilarput. Paarlattuanik tassaavoq sunniivigeqatigiinneq, uagut suliffimmi aamma ilinniarfigisinnaasatsinnik ilinniartut ilinniakkaminnit nutaanik isumassarsianik nassataqartarlutik. Suliffimmi sungiusartuutigut ilinniartullu, suliffimmut piviusumik suliaqarnermik pilersuisut pinngitsoorsinnaanatigit isumaqarpugut,” Mittarfeqarfinni ilinniartitaanermut siunnersorti Malik Skifte oqarpoq
Tamanna ilutigalugu Kalaallit Nunaanni inuusuttut assut ilinniagaqartinneqarnerata nassataraa avataanit sulisartunik pisariaqartitsinerup annikillisinnera. Tamanna assersuutigalugu AFIS-imi suliassaqarfimmi assut iluaqutaasimavoq. AFIS-imi sulisut tassaapput angallannermik aqutsisarfinniittut, timmisartullu attaveqarfiginerinik isumaginnittartut, taamaattumillu ulluinnarni mittarfiit ingerlatarinerini suliarisaat qitiulluinnarlutik. Annertuupilussuarmik ilinniagaqartitsinermik iliuuseqarnermigut Kalaallit Nunaat AFIS-imi sulisunik ullumikkut imminut pilersugarivoq.
Mittarfeqarfinni ilinniakkanik amerlanerit naammassinnittarput
”AFIS-imi ilinniagaq kajungernartuuvoq, atorfininnissamut nangitsillunilu ilinniarnissamut periarfissiilluartoq. Allaat ilinniakkamik naammassisaqaqqammersut ima piumaneqartigaat ilinniagaasa naammassinerisa kingornatigut piffissami aalajangersimasumi Mittarfeqarfinni sulinissaannut pituttortariaqartarsimallutigit,” Malik Skifte oqaluttuarpoq.
AFIS-imi ilinniakkami ilinniartut nutaat arfinillit tiguneqaqqammerput, taakkulu tamarmik ilinniakkaminnik naammassisaqassasut Malik Skiftep naatsorsuutigaa:
”Ukiuni kingulliunerusuni ilinniakkat ingerlatagut pillugit oqaluttuarniarneq assut iliuuseqarfigisimavarput. Nassataraalu qinnuteqartunik amerlasuunik pissarsisarnerput, ullumikkullu pitsaanerpaat akornanni toqqartuisinnaavugut. Siusinnerusukkut qinnuteqartartut ikittunnguummata aamma taamaatiinnartartut amerlapput, ullumikkulli kikkut tamarmik ilinniakkaminnik naammassisaqarnissaat naatsorsuutigaarput, tamannalu pitsaanerpaavoq – Mittarfeqarfinnut, soorunalumi aamma ilinniartunut.”
Tusagassiorfinnit attaveqarfissaq:
Paornánguaq Kleist
Mittarfeqarfinni attaveqaqatigiinnermut pisortaq
Mobiili: +299 597474
E-maili: paok@mit.gl
