Mittarfeqarfinni kiffartuussilluarneq
Mittarfeqarfinni ukiuunerata nalaa kiffartuussinerup attaveqaqatigiinnerullu iluanni sulisut piginnaasaannik pitsanngorsaanermut atorneqarpoq
Mittarfeqarfinni sulisut 400-t missaat qaammatini kingullerni marlussunni atuartitaasimapput, annertunerusumik sullitanut kiffartuussinissaq attaveqaqatigiinnerlu pitsaanerusoq sammineqarsimallutik. Pikkorissartitsinertigut Mittarfeqarfinni ingerlatsinerup sullitanut tunngasuunerusup pitsaanerusullu pilersinnissaa Mittarfeqarfiit kissaatigaa.
Mittarfinnik ingerlatsinerni upalungaarsimanermut tunngatillugu piginnaanngorsaaneq sakkortuumik inatsisilersugaavoq, eqqoqqissaartumillu malittarineqarpoq. Maannakkut inatsisitigut pisussaaffiginngisanik pikkorissartitsinernik ukiorpassuanngortuni aatsaat maannakkut sammisaqartoqarpoq.
Pisortaaneq Marie Fleischer oqarpoq:
– Issittumi pissutsit atugaralugit mittarfiit ingerlannissaannik ukiut 30-t sinnerlugit ingerlataqarsimanitsigut pikkorilluinnartuuvugut. Pissutsini isumannaatsuni timmisartunik aallartitaqartarlutalu nunnitsitsisarnerput uagut piginnaasaqarfigaarput, tamannalu Mittarfeqarfinni uagutsinnut pingaarnerpaavoq.
– Mittarfigut, helikopterinut mittarfigut akunnittarfigullu aqqusaaraangamikkit sullitatta misigisaqarluarnissaat assigiimmik pingaaruteqarput. Taamaattumik sullitatta pitsaanerusumik kiffartuullugillu attaveqarfiginiarlugit sulisorisatta piginnaanngorsarnissaannut aningaasaliinissaq pingaartissimavarput.
Nalilimmik najoqqutassiaq kiffartuussinissamik pikkorissartitsineruinnanngilaq,tassaavorli suliffeqarfimmi sulinermi kulturerisamik allanngortitsiniarluni suliniutip annertunerusup ilaa, anguniagaq tassaalluni sullitamut pitsaasumik kiffartuussinissaq. Manna tikillugu Nalilimmik najoqqutassiami holdinut 28-nut pikkorissartitsinerit naammassineqarsimapput, holdillu kingulliit tallimat qaammammi matumani ulluni marlunni pikkorissartitsinerit ingerlatissavaat.
– Pikkorissartitsinerit nalaanni suliffeqarfimmi kulturerisap allanngortinniarneranik suliniummut qanoq ilapittuuteqarsinnaanerminnut sulisorisat pisortallu tamarmik ilisimasassanik isumassarsianillu pissarsiortorsimapput. Suliffeqarfiup naleqartitai ilisimalerpaat, maannakkullu suliffimmi ulluinnarni atukkaminni kiffartuussinissamik attaveqaqateqarnissamillu sammisaqarnissaminnut najoqqutassatut atugarilersinnaavaat.
– Mittarfiit immikkoortoqarfiillu akimorlugit sulisut akornanni pikkorissartitsinerit aamma attaveqarfiliisimapput, aamma suleqatimik ulluinnarni atugaannik suliassanillu isumaginnittarnerannik ilisimasaqartitsilersimallutik. Mittarfiit immikkoortoqarfiillu akornanni ilisimasanik misilittakkanillu paarlaateqatigiinnissamut sammisaqarniarnitsinni attaveqarfiit naleqarluinnartuupput, Marie Fleischer nassuiaavoq.
Kiffartuussinissamik attaveqaqatigiinnissamillu pikkorissartitsinerit aallartinnginnerini Mittarfeqarfinni sulisut 12-it ilitsersuisartussatut ilinniartitaasimapput. Sulisut pisortallu tamarmik ingerlatamik aqqusaagaqarsimanissaat qulakkeerniarlugu nunap immikkoortuini tamani paarlakaallutik pikkorissartitsisarsimapput.
Tusagassiorfinnit attaveqarfissaq:
Paornánguaq Kleist
Mittarfeqarfinni attaveqaqatigiinnermut pisortaq
Oqarsuaat angallattagaq: +299 597474
E-mail: paok@mit.gl
