Mittarfeqarfinni sulerusussuseqarluarneq
Sulisut naammagisimaarinninnerannik misissuinermik (MTU-mik) ukiorpassuanngortuni Mittarfeqarfiit siullermeertumik ingerlassaqarput, sulisunilu peqataasut 314-it tamaasa ataatsimut isigalugit suliffeqarfik angusarissaartippaat.
Nalunaarsuiffimmi 0-100-mi sulerusussuseq 74 pointinnappoq, suliartornissap qilanaarinera kajumissuseqarfigineralu 80 pointinnalluni, ukiulli marluk qaangiuppata Mittarfeqarfinni suliffeqarnissamik kissaateqarneq 81 pointersuit angullugit. Suliffimmut ilumoorfiginninneq 81 pointinnappoq, Mittarfeqarfinnullu allat suliffissarsioqquserusussuseq 79 pointiniilluni.
– Suliffimmi naammagisimaarluarnissaq pingaartuutipparput, taamaattumik sulinerup nuannarineranik pilersitsiniarluta suliaqartuuvugut. Ilaatigut Sund MIT-ikkut tamatuminnga ingerlassaqarpugut, tassani sammillutigit peqqissuuneq, uninngaannannginneq, ataatsimoornerlu, Mittarfeqarfinni qullersatut pisortaq Marie Fleischer oqaluttuarpoq. Mittarfeqarfiit 2017-imi suliffeqarfittut eqeersimaarfiusutut toqqarneqarpoq, tassani Sund MIT sapaatip akunnerata suliffiusup ingerlanerani timiminnik atugaqarnissaannut sulisut periarfissinnissaannik qularnaareqataalluni.
Siunnersuisartutut suliffeqarfiup Ennovap, nunatsinni suliffeqarfinnut allanut arlalinnut MTU-mik suliaqartartup, Mittarfeqarfiit sinnerlugit sulisut naammagisimaarinninnerannik misissuineq naammassivaa, akissutillu tunngavigalugit sulisut naammagisimaarluarnerisa annertusarnissaat ingerlateqqikkusussagunikku pisortaqatigiit akulikitsumik erseqqissumillu attaveqartarneq samminerussagaat inassutigalugu.
– Annertunerusumik attaveqartarneq tassaavoq suliassaqarfik sianigalugulu iliuuseriffigisarput. Assersuutigalugu pisortaqatigiit mittarfinnilu pisortat akornanni qaammatikkaartumik mittarfiit pillugit ataatsimiittarnerit atugaalersissimavagut, taakkunatigut mittarfinni ataasiakkaani tamani susoqartarneranik pitsaanerusumik malinnaasinnaaneq pilersinniarlutigu. Tamatuma saniatigut Mittarfeqarfinni ataatsimoorussaqartutut misigimanermik nukittorsaaqataasussamik intranetsimik akuuffigisassamik nutaaliaasumillu nutaamik suliaqarneq ingerlatileruttorparput, Marie Fleischer nassuiaavoq.
Sulisunit 425-usunit misissuinermut akissuteqartut 74 procentiupput.
Mittarfeqarfiit suliffeqarfiuvoq namminersortitaq, Kalaallit Nunaanni mittarfinnik 13-inik qulimiguullillu mittarfiinik 43-nik ingerlatsisoq.
Paasissutissat:
Ennovap 0-100-mik nalunaarsuiffimmut pointilersuiffik 1-10 atorsimavaa.
- Qaffasissumik nalilersuut 75-100 procent
- Akunnattumik nalilersuut 60-74 procent
- Appasissumik nalilersuut 0-69 procent
Kisitsisit taaneqartut tassaapput apersukkat taakku tamaasa akornanni agguaqatigiissillugit angusaasut.
Annertunerusumik paasissutissarsioruit attavigisinnaavat Mittarfeqarfinni attaveqarnermut pisortaq, Paornánguaq Kleist, oqarasuaat +299 38 26 02, imaluunniit e-mail poak@mit.gl.
